Навоийда пишган ғишт ишлаб чиқариш цехи давлатга 400 миллион сўмдан ортиқ зарар етказди, деб хабар бермоқда Бош прокуратура матбуот котиби Ҳаёт Шамсутдинов.
Маълум бўлишича, «Баҳор И.О.» МЧЖ мансабдор шахслари жамиятга тегишли бўлган пишган ғишт ишлаб чиқариш цехи мансабдор шахслари истеъмол қилинувчи табиий газни ҳисоблаш ускунасининг кўрсаткичларини ўзгартирган. Оқибатда газ таъминоти ҳудудий филиалининг манфаатларига 417,3 миллион сўмлик зарар етказилган.
Ҳолат юзасидан 30 октябрь куни МИБ Навоий шаҳар бўлими томонидан Жиноят кодексининг 185-2-моддаси 4-қисми (Электр, иссиқлик энергияси, газни ҳисобга олиш асбобларининг кўрсаткичларини ўзгартириш мақсадида уларга ташқаридан аралашиш оқибатида жуда кўп миқдорда зарар етказиш) билан жиноий иш қўзғатилиб, тергов ҳаракатлари олиб борилмоқда.
Ушбу моддада энг кам ойлик иш ҳақининг 300 бараваридан 500 бараваригача миқдорда жарима ёки 2 йилдан 3 йилгача озодликни чеклаш ёхуд 2 йилдан 3 йилгача озодликдан маҳрум қилиш билан жазоси белгиланган.
Етказилган моддий зарарнинг ўрни қопланган тақдирда озодликни чеклаш ва озодликдан маҳрум қилиш тариқасидаги жазо қўлланилмайди.
Изоҳ (0)