Ўзбекистонда битирувчиларининг 100 фоизи ОТМга кирган мактабларда ўқувчилар имтиҳонга қандай тайёрлангани маълум бўлди

Ўзбекистоннинг турли ҳудудларида битирувчиларининг барчаси (100 фоиз) ОТМга кирган мактаблар талайгина, деб хабар қилди Халқ таълими вазири Шерзод Шерматов ўзининг Facebook’даги саҳифасида.

Вазирнинг айтишича, яхши натижа кўрсатган мактаблар қуйидаги ишларни амалга оширган:

1. Ўқувчиларни ОТМга киришга мотивация қилган;
2. 2—3 йил аввалдан ўқувчининг қайси ОТМ йўналишига мойиллиги борлигини аниқлашга ҳаракат қилганлар ва мақсадли равишда тайёргарлик кўрган;
3. Ҳар ойда ёки ҳар 45 кунда ОТМга топширадиган фанлари бўйича ички имтиҳон/тест ўтказиб болаларнинг тайёргарлик ҳолатини баҳолаб турганлар. Баъзилари ўз имкониятларидан келиб чиқиб ДТМ билан шартнома ҳам қилиб бундай тестларни ташкил қилган;
4. Ҳужжат топширганда 3 та ОТМни танлаганда кириш қийин бўлган ОТМлардан ташқари, битта кириш осонроқ бўлган ОТМни ҳам танлаган.
5. Энг кўп дарс соатларини айнан юқори натижа кўрсатган малакали ўқитувчиларга ажратганлар, улардан ортсагина бошқа ўқитувчиларга. Яъни юқори малакали ўқитувчиларнинг билим ва тажрибаларидан кенгроқ фойдаланиш билан бирга уларга энг юқори ойлик ва моддий рағбатлантириш бериш чораларини кўрган.