Бандлик ва меҳнат муносабатлари вазирлиги «Хусусий бандлик агентликлари тўғрисида»ги қонунга ўзгартириш киритиш бўйича ҳужжат лойиҳасини муҳокамага қўйди. Хорижда ишлайдиган ўзбекларни ҳимоя қилишга мўлжалланган лойиҳа 7 ноябрга қадар муҳокама учун очиқ.
«Хусусий бандлик агентликлари тўғрисида»даги қонуннинг 15-моддасини қуйидаги таҳрирдаги учинчи қисм билан тўлдириш таклиф қилинмоқда. «Хизмат кўрсатиш тўғрисидаги шартнома ҳар бир хизмат тури бўйича алоҳида тузилади:
- Ўзбекистон Республикасидан ташқарида иш қидираётган шахсларни ишга жойлаштириш бўйича;
- ишга жойлаштириш соҳасида ахборот ва маслаҳат хизматлари бўйича»
Ўзбекистондан ташқарида иш қидираётган шахсларни ишга жойлаштириш учун тўлов миқдори хусусий бандлик агентлиги ва иш қидираётган шахс ўртасидаги ўзаро келишувга кўра белгиланади, бироқ ишга жойлашган жойдаги хорижий иш берувчи томонидан тасдиқланган бир ойлик иш ҳақи миқдоридан ошмаслиги лозим.
Ўзбекистондан ташқарида иш қидираётган шахсларни ишга жойлаштириш бўйича шартнома имзолангандан сўнг иш қидираётган шахс 2 (икки) иш кун ичида жўнатувчи ташкилот хизматлари нархининг 15 фоизидан кўп бўлмаган миқдорда олдиндан тўловни амалга оширади.
Тўланадиган таҳминий тўлов миқдори хусусий бандлик агентлиги ва иш қидираётган шахс ўртасидаги ўзаро келишувга кўра белгиланади, бироқ қонунчиликда белгиланган базавий ҳисоблаш миқдорининг ўттиз баробаридан кўп бўлмаслиги лозим.
Хусусий бандлик агентлиги томонидан кўрсатилган хизматлар учун якуний ҳисоб-китоблар иш қидираётган шахс томонидан ишчи виза, меҳнат шартномаси лойиҳаси ёки чет эллик иш берувчи томонидан тақдим этилган ва ишга жойлашишни кафолатлайдиган бошқа ҳужжат тақдим этилгандан сўнг амалга оширилади.
Хорижда иш билан таъминлаш тўғрисидаги шартнома хусусий бандлик агентлиги томонидан Ўзбекистон Бандлик ва меҳнат муносабатлари вазирлигининг «labor-migratsion» дастурий таъминоти электрон базасида рўйхатдан ўтказилади.
Қонуннинг 17-модда биринчи қисми қуйидаги таҳрирдаги ўнинчи хатбоши билан тўлдирилиш таклиф қилинди:
- «қонун хужжатларида белгиланган шартларда ва тартибда, Ўзбекистондан ташқаридаги ишни қидираётган шахслар олдида ўз шартномавий мажбуриятларини бажармаганлиги ёки лозим даражада бажармаганлиги билан боғлиқ етказилган зарарни қоплаш учун фуқаролик жавобгарлигини суғурталаши шарт».
Изоҳ (0)