Жиззах вилоятининг Шароф Рашидов туманида раҳбарлик қилиб келаётган Зоир Мирзаев Бош вазир Абдулла Арипов раҳбарлигида ўтаётган Қашқадарёдаги йиғилишда вилоятнинг янги ҳокими сифатида таништирилиши кутилмоқда. Бу ҳақда йиғилишда қатнашган «Дарё» манбаси хабар бермоқда.
Манбага кўра, вилоят ҳокими ҳали таништирилмаган. Аммо Шароф Рашидов тумани ҳокими Зоир Мирзаев йиғилишда қатнашяпти. Вилоятнинг бўшатилиши кутилаётган 4 та раҳбари эса йиғилишда иштирок этмаяпти. Тадбирда Бош вазир Абдулла Арипов сўз олгач, залдаги ОАВ ходимлари чиқариб юборилган.
Зоир Мирзаев Шароф Рашидов туманига ҳоким этиб тайинланишидан аввал Бош вазир ўринбосари ҳамда Қишлоқ ва сув хўжалиги вазири лавозимларида фаолият юритиб келган. 2018 йил октябрида «Оққўрғон воқеаси» сабаб ишдан олиниб, туман ҳокими сифатида иш бошлаганди.
Зоир Мирзаев 1968 йилда Самарқанд вилоятида туғилган, ҳоким сифатидаги иш фаолиятини 2003 йил Жомбой туманидан бошлаган. Сўнгра Самарқанд шаҳар ҳокими, 2010 йилдан 2016 йилгача эса Самарқанд вилояти ҳокими сифатида фаолият кўрсатган.