Россиянинг «Биринчи канал» телеканали бошловчиси ўзбекистонлик Дилбар Файзиева ишдан кетди. Бу ҳақда унинг ўзи Instagram’даги саҳифасида маълум қилди.

«Қайтмайман — бу ҳақда сизларга маълум қилиш вақти келди. Ҳа, мен биринчи каналдан кетяпман. Бу менинг онгли равишда қабул қилган қатъий қарорим. Тонгги эфир дирекцияси раҳбарияти билан ижобий оҳангда хайрлашдик. Ҳеч қандай баландпарвоз сабаблар ва баёнотлар йўқ, ҳаммаси оддий — ҳамкорликни давом эттириш имкони топилмади», — деб ёзган у.

Маълумот учун, ўз ижодий фаолиятини Тошкентда мухбирлик ва радиобошловчиликдан бошлаган Дилбар Файзиева 2012 йилда Москвадаги «РИА Новости» агентлигида махсус мухбир сифатида фаолиятини давом эттирган. 2013 йилда «Мир24» телеканалида янгиликлар дастурини олиб борган. 2014 йилдан бошлаб эса қарийб 5 ярим йил давомида «Биринчи канал»нинг «Доброе утро» дастурида бошловчилик қилган.