Ўзбекистон Давлат божхона қўмитаси томонидан маълум қилинишича, 2019 йил 7 июль куни У.А. исмли шахс бошқарувида бўлган DAF русумли юк машинаси тиркамасига юкланган қиймати 121 минг долларлик чет элда ишлаб чиқарилган 550 минг қути сигарет маҳсулотлари билан Қирғизистон ҳудудига ўтиш мақсадида Бухоро вилоятининг «Олот» чегара божхона пости орқали Ўзбекистонга транзит учун кириб келган.
Бироқ ушбу автотранспорт воситаси ҳайдовчиси гўёки Жиззах вилояти ҳудудида тиркаманинг орқа қисмидан ёнғин чиқиши натижасида юкхонадаги сигарет маҳсулотлари билан биргаликда 2019 йил 14 июль куни тиркама ёниб кетганлиги ҳақида хабар берган.
Ҳайдовчининг айтишича, автотранспорт воситаси орқа ўнг томон шинасининг ёниши оқибатида келиб чиққан ёнғин натижасида автотранспорт воситаси ва ундаги сигарет маҳсулотлари бутунлай ёниб кетган ва уни ўчириш имконияти бўлмаган.
Қўмита томонидан таъкидланишича, катта партиядаги сигаретлар ортилган ушбу автоуловнинг тўсатдан ёниб кетиши ҳақида ҳайдовчи айтган гаплар божхона ходимларини сергак торттирган.
Чунки ушбу сигаретлар Ўзбекистонда божхона расмийлаштирувидан ўтказилганида 6,6 миллиард сўм божхона тўлови тўланиши керак эди.
Шу тариқа Жиззах ва Самарқанд вилояти божхона бошқармаси ходимлари томонидан терговга қадар текширув ҳаракатлари ўтказилиб, мазкур ҳолат юзасидан Жиноят кодексининг 182-моддаси билан жиноят иши қўзғатилган.
Давлат хавфсизлик хизмати Жиззах вилояти бошқармаси Тергов бўлими ҳамда Давлат божхона қўмитаси ходимлари томонидан олиб борилган ҳамкорликдаги саъй-ҳаракатлар натижасида жиноят очилган, яшириб қўйилган сигаретлар Самарқанддан топилган.
Изоҳ (0)