O‘zbekiston Davlat bojxona qo‘mitasi tomonidan ma’lum qilinishicha, 2019-yil 7-iyul kuni U.A. ismli shaxs boshqaruvida bo‘lgan DAF rusumli yuk mashinasi tirkamasiga yuklangan qiymati 121 ming dollarlik chet elda ishlab chiqarilgan 550 ming quti sigaret mahsulotlari bilan Qirg‘iziston hududiga o‘tish maqsadida Buxoro viloyatining “Olot” chegara bojxona posti orqali O‘zbekistonga tranzit uchun kirib kelgan.
Biroq ushbu avtotransport vositasi haydovchisi go‘yoki Jizzax viloyati hududida tirkamaning orqa qismidan yong‘in chiqishi natijasida yukxonadagi sigaret mahsulotlari bilan birgalikda 2019-yil 14-iyul kuni tirkama yonib ketganligi haqida xabar bergan.
Haydovchining aytishicha, avtotransport vositasi orqa o‘ng tomon shinasining yonishi oqibatida kelib chiqqan yong‘in natijasida avtotransport vositasi va undagi sigaret mahsulotlari butunlay yonib ketgan va uni o‘chirish imkoniyati bo‘lmagan.
Qo‘mita tomonidan ta’kidlanishicha, katta partiyadagi sigaretlar ortilgan ushbu avtoulovning to‘satdan yonib ketishi haqida haydovchi aytgan gaplar bojxona xodimlarini sergak torttirgan.
Chunki ushbu sigaretlar O‘zbekistonda bojxona rasmiylashtiruvidan o‘tkazilganida 6,6 milliard so‘m bojxona to‘lovi to‘lanishi kerak edi.
Shu tariqa Jizzax va Samarqand viloyati bojxona boshqarmasi xodimlari tomonidan tergovga qadar tekshiruv harakatlari o‘tkazilib, mazkur holat yuzasidan Jinoyat kodeksining 182-moddasi bilan jinoyat ishi qo‘zg‘atilgan.
Davlat xavfsizlik xizmati Jizzax viloyati boshqarmasi Tergov bo‘limi hamda Davlat bojxona qo‘mitasi xodimlari tomonidan olib borilgan hamkorlikdagi sa’y-harakatlar natijasida jinoyat ochilgan, yashirib qo‘yilgan sigaretlar Samarqanddan topilgan.
Izoh (0)