Ўзбекистоннинг доимий аҳолиси сони 2019 йил 1 октябрь ҳолатига 33,72 миллион кишини ташкил этди, жорий йил бошидан буён аҳоли сони 469 минг нафарга ёки 1,4 фоизга кўпайди. Бу ҳақда Давлат статистика қўмитасининг демографик вазият тўғрисидаги ҳисоботига таяниб, «Gazeta.uz» хабар берди.
Республика ҳудудлари кесимида таҳлилларга кўра, энг кўп аҳоли сони Самарқанд вилоятида бўлиб, республика аҳолиси сонидаги улуши 11,4 фоизни ташкил этган. Кейинги ўринларда Фарғона вилояти 11,1 фоиз, Қашқадарё вилояти 9,7 фоизни ва Андижон вилоятида 9,2 фоиз билан жойлашган.
Республика доимий аҳолиси сонининг 30,5 фоизи меҳнатга лаёқатли ёшдан кичиклар, 59,1 фоизи меҳнатга лаёқатли ёшдагилар ва 10,4 фоизи меҳнатга лаёқатли ёшдан катталар ҳисобланади.
Қайд этилишича, 2019 йилнинг тўққиз ойи давомида 589,7 минг нафар бола туғилган бўлса, бу давр мобайнида 112,2 мингта ўлим ҳолати қайд этилган.
Қайд этилган ўлим ҳолатларининг 60,6 фоизи — қон айланиш тизими касалликлари, 9,8 фоизи — ўсимталар, 6,4 фоизи — бахтсиз ҳодиса, заҳарланиш ва жароҳатланишлар, 5,5 фоизи — овқат ҳазм қилиш аъзолари касалликлари, 4,2 фоизи — нафас олиш аъзолари касалликлари, 1,4 фоизи — юқумли ва паразитар касалликлар ҳамда 12,1 фоизи — бошқа касалликлар сабабли юз берган.
Рўйхатга олинган бир ёшгача вафот этган болалар сони 5,3 минг нафарни ташкил этиб, уларнинг 58,7 фоизи — перинатал даврда юзага келадиган ҳолатлардан, 18,2 фоизи — нафас олиш аъзолари касалликларидан, 12,0 фоизи — туғма аномалиялардан, 2,8 фоизи — юқумли ва паразитар касалликлардан, 2,1 фоизи — бахтсиз ҳодиса, заҳарланиш ва жароҳатланишлардан, 0,7 фоизи — овқат ҳазм қилиш аъзолари касалликларидан ва 5,5 фоизи — бошқа касалликлардан вафот этган.
Аҳолининг табиий ўсиши 477,5 минг кишини ташкил этиб, 2018 йил мос даврига нисбатан 36,7 минг кишига ўсган. Ўтган йилнинг январь—сентябрь ойларида аҳоли сонининг ўсиши 440,8 минг кишини ташкил қилган.
Маълум қилинишича, ФҲДЁ органлари томонидан 194,9 мингта никоҳ қайд этилган, мос равишда 1000 нафар аҳолига нисбатан никоҳ тузиш коэффициенти 7,8 промиллени ташкил қилган. 2018 йилнинг мос даврига нисбатан сезиларли камайиш Қашқадарё (7,0 фоиз), Хоразм (4,2 фоиз), Самарқанд (3,4 фоиз) ва Фарғона (2,1 фоиз) вилоятларида кузатилган.
ФҲДЁ органлари томонидан 23,6 мингта никоҳдан ажралиш ҳолати қайд этилган бўлиб, мос равишда 1000 нафар аҳолига нисбатан никоҳдан ажралиш коэффициенти 0,9 промиллени ташкил этган. 2018 йилнинг мос даврига нисбатан сезиларли камайиш Самарқанд (8,8 фоиз), Навоий (7,6 фоиз) ва Андижон (6,9 фоиз) вилоятларида қайд этилган.
Ажримлар сонида 2018 йилнинг мос даврига нисбатан юқори ўсиш суръатлари Тошкент шаҳри (8,8 фоиз) ва Жиззах (3,9 фоиз) вилоятига тўғри келган.
2019 йилнинг дастлабки тўққиз ойида республика бўйича кўчиб келганлар сони 117,6 минг кишини, шу жумладан, 115,6 минг киши республика ҳудудларидан, 2 минг киши хорижий мамлакатлардан, кўчиб кетганлар сони эса 126,1 минг кишини, шундан 115,6 минг киши республика ҳудудларига, 10,5 минг киши хорижий мамлакатларга, ташкил қилган. Миграция салдоси минус 8,5 минг киши бўлиб, 2018 йилнинг мос даврида минус 11,7 минг киши бўлган.
Ўзбекистонга доимий яшаш учун келганлар сони 1971 кишини ташкил этиб, уларнинг 31,1 фоизи Қозоғистон, 23,1 фоизи Тожикистон, 22,8 фоизи Россия, 13,3 фоизи Қирғизистон ва 9,7 фоизи бошқа давлатлардан келган.
Изоҳ (0)