Интернет тармоғида Ўзбекистон истеъмолчиларига жорий йилда 69 миллиард кВт/соат электр энергияси зарур бўлиши, ишлаб чиқариш эса 64 миллиард кВт/соатни ташкил этиши, гўёки етмаётган 5 миллиард кВт/соат электр энергияси Афғонистонга экспорт қилинаётгани ҳақида маълумотлар тарқалди. Ўзбекистон Энергетика вазирлиги мазкур хабарларга муносабат билдирди.
Вазирлик баёнотига кўра, тармоқларда мамлакатда танқис бўлган энергия қўшни давлатга сотилаётгани, шунинг учун электр таъминотида узилишлар бўлаётгани муҳокама этилмоқда.
Ўзбекистон Энергетика вазирлиги тизимида фаолият юритаётган «Ўзбекистон миллий электр тармоқлари» АЖ томонидан маълум қилинишича, Ўзбекистон Республикасининг юқори кучланишли ерусти тармоқлари чегарадош мамлакатларнинг магистрал электр тармоқлари билан барқарорликда ишлайди. Қўшни мамлакатлар диспетчерлик хизматлари ўзаро мувофиқлашув асосида минтақанинг энергия хавфсизлигини таъминлайди.
Бунинг сабаби магистрал электр тармоқ лойиҳалари МДҲ давлатлари ҳали Собиқ Иттифоқ таркибида бўлганида лойиҳалаштирилгани ва бир-бирига чамбарчас боғлиқ ҳолда қурилгани ҳисобланади.
Баёнотда айтилшича, Ўзбекистон электр энергияни экспорт қилиши қаторида импорт ҳам қабул қилади. Жорий йилнинг тўққиз ойи давомида импорт қилинган электр энергияси ҳажми жами 2,6 миллиард кВт/соатни ташкил этган, 1,2 миллиард кВт/соат электр энергияси Афғонистонга экспорт қилинган.
Компания томонидан маълум қилинишича, ички истеъмол учун мўлжалланган электр энергияси Афғонистонга экспорт қилинмайди.
Қайд этилишича, электр энергияси экспортининг асосий мақсади — қўшни Афғонистонни ижтимоий-иқтисодий томондан қўллаб-қувватлаш, шу йўл билан қўшни мамлакатда барқарор вазиятни таъминлашга ҳисса қўшиш. Мазкур амалиёт ҳукуматлараро келишувлар билан мустаҳкамланган.
Баёнотга кўра, электр энергияси таъминотидаги узилишлар энергиядан нотўғри ва бесамар фойдаланиш оқибатида юзага келадиган турли авариялар, юқори ва ўрта кучланишли подстанцияларни замонавий ускуналар билан жиҳозлаш билан боғлиқ. Симёғочларни алмаштиришдаги вақтинчалик узилишлар, қурилиш-таъмирлаш ишлари олиб борилаётган пайтдаги вақтинчалик тармоқдан узиб туриш ва шунга ўхшаш бошқа хавфсизлик талабларига мувофиқ узилишлар электр энергияси соҳасидаги халқаро экспорт ва импорт масалалари билан бевосита боғлиқ эмас.
Изоҳ (0)