Ички ишлар вазирлиги YouTube видеохостингида «Сурхондарё ГАИлари наманганлик ҳайдовчига ноҳақлик қилди» сарлавҳаси остида тарқалган видеога муносабат билдирди.
Ушбу ҳолат юзасидан Сурхондарё вилояти Ички ишлар бошқармаси берган маълумотга кўра, 19 октябрь куни вилоят ИИБ Йўл ҳаракати хавфсизлиги бошқармаси ЙПХ инспектори М-39 автомобиль йўлининг Шеробод тумани ҳудудидан ўтувчи 1388-километрида хизмат олиб бораётган бўлган. MAN русумли юк машинаси эса белгиланган тезликни ошириб, соатига 91 километр тезлик билан ҳаракатланиб келаётганлиги учун ЙПХ инспектори томонидан тўхтатилган.
Ўз навбатида, юк автомашинаси ҳайдовчисига содир этган қоидабузарлиги тушунтирилиб, унга нисбатан Маъмурий жавобгарлик тўғрисидаги кодекснинг 281-моддаси ҳамда ички ишлар вазирининг 2011 йил 31 май кунидаги 68-сонли буйруғи талаблари асосида маъмурий баённома расмийлаштирилган.
Ҳайдовчи маъмурий баённома билан танишиб, имзо қўйган ва ундан аввал эса ҳайдовчининг талабига асосан унинг содир этган қоидабузарлигини исботловчи фотосурат кўрсатилган.
Айни вақтда ҳайдовчининг аризасига биноан Шеробод тумани прокуратураси томонидан суруштирув ишлари амалга оширилмоқда.
Изоҳ (0)