2019 йилнинг январь—сентябрь ойлари давомида Бош прокуратура ҳузуридаги Мажбурий ижро бюроси Тошкент шаҳар бошқармасига суд ҳужжатлари ва бошқа органлар ҳужжатларини ижро этиш йўналиши бўйича 9,687 триллион сўмлик 667 493 та ижро ҳужжати келиб тушган, шундан, 5,779 триллион сўмлик 383 471 та ижро ҳужжатининг ижроси таъминланган. Бу ҳақда Бюронинг Тошкент шаҳар бошқармаси «Дарё»га маълум қилди.
Шунингдек, бошқарма ва ҳудудий туман бўлимларида 27 мингдан ортиқ алимент ундируви билан боғлик ижро ҳужжати мавжуд бўлиб, жорий йилнинг тўққиз ойи мобайнида 324 нафар қарздорга нисбатан маъмурий жавобгарлик масаласи кўрилган. 20 нафар алиментчи оталарга нисбатан Ўзбекистон Республикаси Жиноят Кодексининг 122-моддасига асосан, жиноят ишлари қўзғатилган.
Алимент пулларини тўламасдан яшириниб юрган 168 нафар қарздор қидириб топилган ва улардан алимент пуллари ундириб берилган. 65 нафар қарздорга нисбатан қидирув ишлари давом эттирилмоқда.
Алимент тўлови бўйича қарздор шахслар билан ўтказилган профилактика ва тушунтириш ишлари натижасида 229 та оила яраштирилган.
Бошқарма ва унинг туман бўлимлари томонидан истеъмолчилардан энергия ресурслари ва сув таъминоти бўйича жорий йилнинг тўққиз ойи давомида 3,145 триллион сўм ундирилган. Ундирув ўтган йилнинг шу даврига нисбатан 1,381 триллион сўмга ошган.
Хабар берилишича, 2017 йилнинг июль ойидан шу кунга қадар 17 335 нафар истеъмолчига нисбатан 28,2 миллиард сўмлик нореал қарздорлик аниқланиб, улар олиб ташланган.
Изоҳ (0)