«Валютани тартибга солиш тўғрисида»ги қонуннинг янги таҳрири кучга кириши билан валюта «қора бозори» йўқ бўлиб қолмайди. Бу ҳақда Марказий банк раиси ўринбосари Бобур Абубакиров янги таҳрирда қабул қилинган «Валютани тартибга солиш тўғрисида»ги қонун муҳокамасига бағишланган матбуот анжуманида айтиб ўтди, дея хабар бермоқда «Дарё» мухбири Мусулмонбек Иброҳимов.
Анжуманда Бобур Абубакиров валютага оид янги таҳрирдаги қонун кучга кириши билан «қора бозор» фаолиятига барҳам бериладими ёки йўқми, қабилидаги саволга жавоб бераркан, ушбу муаммонинг ечими кўпроқ валюта билан боғлиқ бўлмаган масалаларга тааллуқли эканлигини таъкидлади.
«Охирги вақтларда ноҳалол хўжалик юритувчи субъект деган тушунча пайдо бўлди. Яъни, ноҳалол субъект солиқдан қочиш ёки мажбурий тўловлардан бош тортиш мақсадида ўз фаолиятини банкдан ташқарида амалга оширади. Лекин бу уларга қарши ҳеч қандай иш қилинмайди дегани эмас. Маълум бир иқтисодий чоралар кўрилади», — деди Марказий банк раиси ўринбосари.
«Биринчи навбатда, хўжалик юритувчи субъект бўладими, жисмоний шахс бўладими, резидент ёки норезидент бўладими — ўз валюта маблағини эркин тасарруф қилишига шарт-шароит яратиш билан курашилади. Қулайликлар яратилгач, ўйлашимча, ўзи-ўзидан ‘қора бозор’га ёки хуфиёна иқтисодиётга, банкдан ташқари валюта амалиётларига барҳам берилади», — деди у.
Аввалроқ Ўзбекистон Сенатининг 23-ялпи мажлисида Марказий банк раиси Мамаризо Нурмуротов «қора бозор»га қарши прокуратура ёки бошқа органлар орқали курашишни тўғри деб ҳисобламаслигини таъкидлаган эди.«Муаммони фақат ва фақат қилаётган иқтисодий хатти-ҳаракатларимиз билан, аҳолини миллий валютамизга бўлган ишончини шакллантириш ва мустаҳкамлаш билан бартараф этиш мумкин. Энг аввало, биз бунга шароит яратиб берсак, хорижий валютада олди-сотди қилиш ҳолатлари ўз-ўзидан камайиб кетаверади», — деб айтганди Марказий банк раиси.
Изоҳ (0)