Давлат хавфсизлик хизмати ходимлари томонидан Наманган ва Андижон вилоятларида ўтказилган тезкор тадбирлар натижасида гиёҳванд моддалар савдоси билан шуғулланувчи бир нечта шахс фаолиятига чек қўйилди. Бу ҳақда ЎзА хабар берди.
Жумладан, Наманган шаҳрида яшовчи Эркин Мавлонов, Мирзоҳид Лутфиллаев ва Баҳодир Турғунов гиёҳвандлик моддасини харид қилиш мақсадида Қирғизистон Республикасининг Жалолобод вилояти Ахси туманига борган. У ерда Элнур исмли шахсдан 2,942 килограмм «гашиш»ни 15 минг долларига сотиб олишга келишган. Пулни олиб келгунга қадар гаров тариқасида Мирзоҳид Лутфуллаевнинг фуқаролик паспорти ҳамда Баҳодир Турғуновнинг ўзи Қирғизистон ҳудудида қолган.
Шундан сўнг Эркин Мавлонов Ўзбекистонга қайтиб келган. Мирзоҳид Лутфуллаев эса гиёҳванд моддани айланма йўллар орқали республикага олиб кирган, лекин оғуни Мавлоновга бераётган вақтда уларнинг иккаласи ҳам қўлга олинган.
Шундан сўнг, тезкор тадбир давом эттирилиб Баҳодир Турғунов ҳам қўшни мамлакатдан олиб келинган. Текширувлар давомида унинг уйидан 158 грамм «гашиш» моддаси топилган.
Шунингдек, Давлат хавфсизлик хизмати ходимлари томонидан ўтказилган бошқа бир тезкор тадбир давомида 1973 йилда Наманган шаҳрида туғилган, муқаддам судланган, Маъсум Раҳматжонов вилоят марказидаги Сарбон тантаналар мажмуаси олдида Қирғизистон Республикасидан контрабанда йўли билан келтирилган 7,667 килограмм «гашиш» моддасини олиб кетаётган вақтида ушланган.
Бу каби ҳолатлар Андижон вилоятида ҳам қайд этилган. 1987 йил Андижон шаҳрида туғилган Ўткирбек Холматовга қирғизистонлик Дилбар исмли аёл ўзбек—қирғиз давлат чегарасини ажратиб турувчи Шаҳрихонсой каналига қўшни давлат ҳудудида туриб, «гашиш» гиёҳвандлик моддаси жойланган беш дона елим идишни оқизиб юборган. Холматов эса келишилган вақтда ушбу елим идишларни каналнинг Қўрғонтепа тумани «Маъмуробод» МФЙ ҳудудидан оқиб ўтган қисмидан қабул қилиб олган. Шундан сўнг Ўткирбек Холматов ҳамтовоғи Жасурбек Халилов бошқарувидаги Cobalt автомобилида гиёҳвандлик моддасини Андижон шаҳрига олиб кетаётган вақтда ДХХ ходимлари томонидан қўлга олинган. Текширув давомида уларнинг ёнида 1,982 килограмм «гашиш» моддаси борлиги маълум бўлган.
Бундан ташқари, Қўрғонтепа тумани Қорасув шаҳрида яшовчи, 1996 йилда туғилган Лочинбек Латипжонов ҳам қирғизистонлик Абдулазиз исмли шахс томонидан Шахрихонсой канали орқали оқизиб юборилган 2,81 килограмм «гашиш» моддасини қабул қилиб олиб, келгусида сотиш учун ўз яшаш хонадонига яшириб қўйган. ДХХ ходимлари томонидан ўтказилган тезкор тадбир давомида ушбу гиёҳванд модда ҳам тегишли тартибда расмийлаштириб олинган.
Ўтказилган тезкор тадбирлар натижасида оғуфурушлардан жами 15,559 килограмм «гашиш» гиёҳванд моддаси ашёвий далил сифатида олинган.
Ҳозирда ушбу ҳолатлар юзасидан Ўзбекистон Республикаси Жиноят Кодексининг тегишли моддаларига мувофиқ жиноят ишлари қўзғатилиб, тергов ҳаракатлари олиб борилмоқда.
Изоҳ (0)