Шанхай Ҳамкорлик Ташкилоти Минтақавий антитеррор тузилмаларининг янгона қидирув реестрига жиноят содир этган ёки экстремизм ва терроризмда гумонланган 6600 дан ортиқ киши киритилди. Бу ҳақда «Gazeta.uz» хабар берди.
ШҲТ Минтақавий антитеррор тузилмаларининг ижрочи директори Жумахон Ғиёсов 15—17 октябрь кунлари Россия Федерал хавфсизлик хизматининг ҳамкорлари бўлган махсус хизматлар ва хавфсизлик органлари раҳбарларининг Сочи шаҳрида бўлиб ўтган йиғилишида иштирок этди.
Жумахон Ғиёсовнинг маълум қилишича, ШҲТ Минтақавий антитеррор тузилмалари ишининг асосий муҳим йўналишларидан бири террористик ва экстремистик фаолиятга алоқадор бўлган фуқароларнинг қидирувини амалга оширишда ҳамкорлик қилишдан иборат. Бу вазифани амалга оширишга кўмаклашиш мақсадида ШҲТ Минтақавий антитеррор тузилмалари ижроия қўмитаси томонидан ягона қидирув реестри тузилган бўлиб, доимий равишда янгилаб борилади. Рўйхатга 6600 дан ортиқ юқорида кўрсатилган тоифаларга кирувчи шахслар киритилган.
Ижроия қўмита раҳбарининг қайд этишича, ШҲТ мамлакатлари махсус хизматлари ўртасида маълумот алмашиш мақсадида хорижий жангари террорчиларни рўйхатга олиш жадвали ишлаб чиқилган ва жадвалга 4500 дан ортиқ шахснинг маълумотлари киритилган.
Минтақавий антитеррор тузилмалари томонидан 115 дан ортиқ террористик, сепаратистик ва экстремистик ташкилотнинг рўйхати тузилган. Рўйхатдаги ташкилотларнинг фаолияти ШҲТга аъзо давлатлар ҳудудида тақиқланган. Хусусан, рўйхатга «Ал-Қоида», ИШИД, «Шарқий Туркистон Ислом ҳаракати», «Ҳизб-ут Таҳрир ал-Исломий», «Туркистон ислом қайта тикланиши партияси» кирган.
2018 йилда ШҲТ мамлакатлари махсус хизматлари томонидан 600 нафар террорчи ва экстремист қўлга олинган, шунингдек, 360 тадан ортиқ тайёрланаётган теракт ва диний-эктремистик характердаги жиноят бартараф қилинган. Тезкор тадбирлар давомида 170 тадан ортиқ қўлбола портловчи қурилмалар олиб қўйилган, террористик ва экстремистик мазмунга эга 165 мингдан ортиқ интернет ресурсига кириш чекланган.
Изоҳ (0)