Россиянинг «Урал» баскетбол жамоаси шифокори Сергей Дацун Владивостокдан Новосибирск шаҳрига учаётган самолёт бортида тоби қочган Ўзбекистон фуқаросининг жонини сақлаб қолди. Бу ҳақда жамоанинг ижтимоий тармоқлардаги саҳифаларига таяниб, «Российская газета» хабар берди.
Маълум қилинишича, баскетбол жамоаси Суперлига баҳсида иштирок этиб қайтаётган бўлган. Спортчиларга жамоа шифокори Сергей Дацун ҳамроҳлик қилган. Парвоз вақтида самолёт учувчиси бортда шифокорлар бўлса, борт кузатувчиларига мурожаат қилишини сўраган. Жамоа шифокори борт кузатувчиларига мурожаат қилган.
Ўзбекистон фуқароси бўлган йўловчи парвознинг учинчи соатида ўзини ёмон ҳис қила бошлаган. Шифокорнинг сўзларига кўра, унинг ҳаёти хавф остида бўлган. Борт кузатувчилари йўловчини жонлантиришга ёрдам берган, бунга 40—50 дақиқа кетган. Йўловчининг қонида қанд миқдори пасайиб кетган, юрак уриши сезилмай қолган, қон босими жуда пасайиб кетган, ҳушини йўқотган.
Шундан сўнг, борт капитани самолётни Брацк шаҳри аэропортига қўндирган ва тез ёрдам чақирилган. Шифокорлар самолёт бортида йўловчини текширган ва унга парвозни давом эттиришга рухсат берган. Новосибирскка етиб боргач, йўловчи самолётни мустақил тарк этган.
Эслатиб ўтамиз, 15 октябрь, сешанба куни Фарғонадан Москвага парвоз пайти йўловчилардан бири ўзини ёмон ҳис қилгани учун Uzbekistan Airways самолёти Самарада фавқулодда қўнган эди. Ўзбекистон фуқароси бўлган йўловчи 6-сон Самара шаҳар касалхонасига жойлаштирилган. Кейинроқ Ўзбекистон Ташқи ишлар вазирлиги унинг соғлиғи барқарорлашгани ва яқин кунларда унга рухсат берилиши ҳақида хабар берди.
Изоҳ (0)