«Дарё» интернет-нашрида 17 октябрь куни Тошкент давлат аграр университети ректори Ботиржон Сулаймоновнинг «Ўзбекистон 24» телеканали «Ахборот 24» информацион дастурига берган интервьюсига асосланиб, «Аграр университет ректори Ўзбекистонда шу вақтгача боғдорчилик ва узумчилик мутахассислари тайёрланмаганини айтди. Ваҳоланки университетда Мева-сабзавотчилик ва узумчилик факультети бор» сарлавҳали хабар эълон қилинган эди.
Тошкент давлат аграр университети ушбу хабарга раддия берди. Раддия матни билан қуйида танишиш мумкин.
Президент Шавкат Мирзиёев раислигида 16 октябрь куни чорвачилик ва боғдорчилик тармоқларини ривожлантириш бўйича устувор вазифаларга бағишланган йиғилишда берилган топшириқлардан келиб чиқиб, Тошкент давлат аграр университети ректори Ботиржон Сулаймонов «Ўзбекистон 24» телеканалининг «Ахборот 24» информацион дастурига берган интервьюсида: «Ҳақиқатдан шу вақтгача боғдорчилик бўйича ёки узумчилик соҳаси бўйича мутахассислар тайёрланган эмас», деб айтган.Ректорнинг ушбу жумласи «Дарё» интернет-нашри сайти томонидан нотўғри талқин қилинган ва асоссиз равишда танқид остига олинган.
Жумладан, Тошкент давлат аграр университети ва унинг филиалларида 2010 йилдан бошлаб Агрономия таълим йўналиши негизида Мева-сабзавотчилик ва узумчилик бакалавриат таълим йўналиши бўйича кадрлар тайёрлаш йўлга қўйилган.
Аммо ушбу таълим йўналиши талабалари мева-сабзавотчилик ва узумчилик бўйича умумий агрономик билимларни ўзлаштирган бўлиб, тор мутахассисликлар (мевачилик, узумчилик, сабзавотчилик, полизчилик, картошкачилик) бўйича чуқур билимларга эга бўлмаганлиги ҳақида қисқача изоҳ берилган.
Президентнинг 2018 йил 8 майдаги «Тошкент давлат аграр университетида олий маълумотли кадрлар тайёрлаш тизимини тубдан такомиллаштириш чора-тадбирлари тўғрисида»ги қарорига асосан 2018/2019 ўқув йилидан бошлаб кадрлар истеъмолчиларининг таклифлари, қишлоқ хўжалигида соҳасида олиб борилаётган кенг ислоҳотлар натижасида янги тор мутахассисликлар бўйича, яъни Мева-сабзавотчилик ва узумчилик таълим йўналиши негизида учта янги — Мевачилик ва узумчилик; Сабзавотчилик, полизчилик ва картошкачилик; Иссиқхона хўжалигини ташкил этиш ва юритиш каби таълим йўналишларида мутахассислар тайёрлаш йўлга қўйилди.
Ҳозирги кунда ушбу йўналишларининг 1—2-курсларида жами 195 нафар талаба таҳсил олмоқда.
Шунингдек, ушбу таълим йўналишлари бўйича илмий-тадқиқот ишларини олиб бориш, малакали илмий-педагог кадрлар тайёрлаш мақсадида Мева-сабзавотчилик ва узумчилик кафедраси негизида Мевачилик ва узумчилик, Сабзавотчилик, полизчилик ва картошкачилик кафедралари ташкил этилди.
Ушбу йўналишлар битирувчилари 2022 йилдан ўқишни тамомлаб боғдорчилик, узумчилик, сабзавотчилик, иссиқхона хўжаликларида иш фаолиятларини олиб боришади. Шу нуқтаи назардан ҳозирда боғдорчилик ва узумчилик соҳалари бўйича тор мутахассислар тайёрланмаган.
Шу билан бирга, Президентнинг 2019 йил 19 августдаги «Тошкент давлат аграр университети фаолиятини янада такомиллаштириш чора-тадбирлари тўғрисида»ги қарорида мевачилик ва узумчилик соҳаларини юқори малакали кадрлар кадрлар билан таъминлаш ҳамда мева-сабзавот экинлари селексияси ва уруғчилигини ривожлантириш мақсадида 2020/2021 ўқув йилидан бошлаб Субтропик ва цитрус мева экинлари, Мева-сабзавот экинлари селексияси ва уруғчилиги магистратура мутахассисликлари бўйича кадрлар тайёрлаш йўлга қўйилиши белгиланган.
Юқоридагилардан келиб чиқиб, Тошкент давлат аграр университети «Дарё» интернет-нашридан юқоридаги қайд этилган мақолада ташкилотнинг шаъни ва қадр-қиммати ҳамда ишчанлик обрўсини камситувчи маълумотлар мавжудлиги муносабати билан раддия беришни, шунингдек келгусида университет фаолиятига оид бирор хабар ёки маълумот эълон қилишдан аввал унинг ҳақиқатга мос келиш-келмаслигини университет билан боғланиб текшириб олиш мақсадга мувофиқ эканлиги эслатилади.
Тошкент давлат аграр университети
Изоҳ (0)