16 октябрь куни «Корея Республикаси – Марказий Осиё» 12-ҳамкорлик форумида иштирок этиш учун Нур-Султон шаҳрига келган Ўзбекистон ташқи ишлар вазири Абдулазиз Комилов Жанубий Корея ташқи ишлар вазири Кан Гён Хва билан учрашди. Бу ҳақда вазирлик матбуот хизмати хабар берди.
Вазирлар жорий йил 18—21 апрель кунлари президент Мун Чжэ Иннинг Ўзбекистонга давлат ташрифи ва Президент Шавкат Мирзиёев билан музокаралари доирасида эришилган кўп қиррали келишувларни бажаришнинг боришини кўриб чиқди.
Сиёсий, савдо-иқтисодий, инвестиция, маданий-гуманитар ва бошқа соҳалардаги икки томонлама муносабатларнинг ўсувчан аҳамияти мамнуният билан қайд этилди. 2019 йилнинг биринчи ярмида савдо айланмаси ҳажми 1,8 миллиард АҚШ долларини ташкил қилиб, бу ўтган йилнинг айни шу кўрсатгичидан 75 фоизга кўпроқ.
Учрашувда қўшма инвестиция ҳамда ижтимоий аҳамиятга эга лойиҳаларни амалга оширишни давом эттириш механизмлари, «электрон ҳукумат»ни жорий этиш, ахборот-коммуникация технологиялари, таълим, соғлиқни сақлаш ва қишлоқ хўжалиги жабҳаларидаги ҳамкорлик истиқболлари кўриб чиқилди.
Ташқи сиёсат идоралари раҳбарлари томонларни қизиқтирган халқаро ва минтақавий масалалар юзасидан ҳам фикр алмашдилар.
Изоҳ (0)