Toshkent davlat agrar universiteti “Daryo”da chiqqan xabarga raddiya berdi

Prezident Shavkat Mirziyoyev raisligida 16-oktabr kuni chorvachilik va bog‘dorchilik tarmoqlarini rivojlantirish bo‘yicha ustuvor vazifalarga bag‘ishlangan yig‘ilishda berilgan topshiriqlardan kelib chiqib, Toshkent davlat agrar universiteti rektori Botirjon Sulaymonov “O‘zbekiston 24” telekanalining “Axborot 24” informatsion dasturiga bergan intervyusida: “Haqiqatdan shu vaqtgacha bog‘dorchilik bo‘yicha yoki uzumchilik sohasi bo‘yicha mutaxassislar tayyorlangan emas”, deb aytgan.

Rektorning ushbu jumlasi “Daryo” internet-nashri sayti tomonidan noto‘g‘ri talqin qilingan va asossiz ravishda tanqid ostiga olingan.

Jumladan, Toshkent davlat agrar universiteti va uning filiallarida 2010-yildan boshlab Agronomiya ta’lim yo‘nalishi negizida Meva-sabzavotchilik va uzumchilik bakalavriat ta’lim yo‘nalishi bo‘yicha kadrlar tayyorlash yo‘lga qo‘yilgan.

Ammo ushbu ta’lim yo‘nalishi talabalari meva-sabzavotchilik va uzumchilik bo‘yicha umumiy agronomik bilimlarni o‘zlashtirgan bo‘lib, tor mutaxassisliklar (mevachilik, uzumchilik, sabzavotchilik, polizchilik, kartoshkachilik) bo‘yicha chuqur bilimlarga ega bo‘lmaganligi haqida qisqacha izoh berilgan.

Prezidentning 2018-yil 8-maydagi “Toshkent davlat agrar universitetida oliy ma’lumotli kadrlar tayyorlash tizimini tubdan takomillashtirish chora-tadbirlari to‘g‘risida”gi qaroriga asosan 2018/2019 o‘quv yilidan boshlab kadrlar iste’molchilarining takliflari, qishloq xo‘jaligida sohasida olib borilayotgan keng islohotlar natijasida yangi tor mutaxassisliklar bo‘yicha, ya’ni Meva-sabzavotchilik va uzumchilik ta’lim yo‘nalishi negizida uchta yangi — Mevachilik va uzumchilik; Sabzavotchilik, polizchilik va kartoshkachilik; Issiqxona xo‘jaligini tashkil etish va yuritish kabi ta’lim yo‘nalishlarida mutaxassislar tayyorlash yo‘lga qo‘yildi.

Hozirgi kunda ushbu yo‘nalishlarining 1—2-kurslarida jami 195 nafar talaba tahsil olmoqda.

Shuningdek, ushbu ta’lim yo‘nalishlari bo‘yicha ilmiy-tadqiqot ishlarini olib borish, malakali ilmiy-pedagog kadrlar tayyorlash maqsadida Meva-sabzavotchilik va uzumchilik kafedrasi negizida Mevachilik va uzumchilik, Sabzavotchilik, polizchilik va kartoshkachilik kafedralari tashkil etildi.

Ushbu yo‘nalishlar bitiruvchilari 2022-yildan o‘qishni tamomlab bog‘dorchilik, uzumchilik, sabzavotchilik, issiqxona xo‘jaliklarida ish faoliyatlarini olib borishadi. Shu nuqtai nazardan hozirda bog‘dorchilik va uzumchilik sohalari bo‘yicha tor mutaxassislar tayyorlanmagan.

Shu bilan birga, Prezidentning 2019-yil 19-avgustdagi “Toshkent davlat agrar universiteti faoliyatini yanada takomillashtirish chora-tadbirlari to‘g‘risida”gi qarorida mevachilik va uzumchilik sohalarini yuqori malakali kadrlar kadrlar bilan ta’minlash hamda meva-sabzavot ekinlari seleksiyasi va urug‘chiligini rivojlantirish maqsadida 2020/2021 o‘quv yilidan boshlab Subtropik va sitrus meva ekinlari, Meva-sabzavot ekinlari seleksiyasi va urug‘chiligi magistratura mutaxassisliklari bo‘yicha kadrlar tayyorlash yo‘lga qo‘yilishi belgilangan.

Yuqoridagilardan kelib chiqib, Toshkent davlat agrar universiteti “Daryo” internet-nashridan yuqoridagi qayd etilgan maqolada tashkilotning sha’ni va qadr-qimmati hamda ishchanlik obro‘sini kamsituvchi ma’lumotlar mavjudligi munosabati bilan raddiya berishni, shuningdek kelgusida universitet faoliyatiga oid biror xabar yoki ma’lumot e’lon qilishdan avval uning haqiqatga mos kelish-kelmasligini universitet bilan bog‘lanib tekshirib olish maqsadga muvofiq ekanligi eslatiladi.

Toshkent davlat agrar universiteti