Ўзбекистонда боғдорчилик ва узумчиликка ихтисослашган хўжаликлар ривожланишнинг навбатдаги босқичи — экспортбоп, бозорда талабгир маҳсулотлар етиштириш босқичига ўтиш керак. Бу ҳақда Ўзбекистон қишлоқ хўжалиги вазири Жамшид Хўжаев 16 октябрь куни «Ахборот 24» информацион дастурига берган интервьюсида таъкидлаб ўтди.
16 октябрь куни Ўзбекистон Президенти Шавкат Мирзиёев чорвачилик ва боғдорчилик тармоқларини ривожлантириш бўйича устувор вазифаларга бағишланган йиғилиш ўтказди. Давлат раҳбарининг матбуот хизмати берган ахборотга кўра, Ўзбекистондаги мева-сабзавотга ихтисослашган барча 55 та туманда боғдорчилик соҳасида мутлақо янги — кооперация тизими жорий қилиниши билдирилган.
Унга кўра, хориж бозорларида ўз товар белгисига эга бўлган экспортчилар ҳамда қайта ишлаш корхоналари иштирокида ушбу туманларда кооперациялар ташкил этилади. Ҳар бир туманда экинларни жойлаштириш кооперациялар таклифи бўйича амалга оширилади, улар боғ ва токзорларга кўчатларни етказиб бериш, ҳосилдорликни ошириш юзасидан кўмаклашади.
Бугун 180 минг гектар боғларимиздан бор-йўғи 45 минг гектари интенсив ҳисобланади. Уларнинг аксарияти юртбошимиз 2019 йил бошида Боғдорчилик ва иссиқхона хўжалигини ривожлантириш агентлиги, Узумчилик ва виночиликни ривожлантириш агентлигини ташкил қилганларидан сўнг ишга тушди.Президент матбуот хизматининг қўшимча қилишича, Президент раислигидаги йиғилишда Молия вазирлиги ва Қишлоқ хўжалиги вазирлигига янги тизимни жорий этиш, кооперацияларни молиявий таъминлаш юзасидан аниқ амалий таклифлар ишлаб чиқиш топширилган.Ҳозирги жараёнлар боғдорчилик ва узумчиликни ривожлантиришнинг биринчи босқичи деб олинадиган бўлса, энди кейинги босқичга — эски боғларни янгилаш, иқтисодий самара бермаётган экинлар ўрнига экспортбоп, бозорларда талабгир маҳсулотлар етиштириш босқичига ўтиш керак. Шундай топшириқлар бўлди.
Агар ҳозир оддий фермерга интенсив боғ ташкил қил, деб масала қўядиган бўлсак, у, албатта, ўз бозорини топишга, қандай нав экиш масаласида анча қийналади. Шу боис янги механизмни ташкил қилиш бўйича топшириқ бўлди. Бу — уч томонлама кооперация тизими бўлади.
Қайта ишлаб чиқариш қувватларига эга илғор корхоналар ўз эҳтиёжидан келиб чиқиб, буюртма асосида фермерлар билан ҳамкорликда ишлайди. Кооперация боғ яратишда ҳам илм, ҳам технология, ҳам маҳсулотга бозор топиш билан ёрдам беради. Фермер фақат маҳсулот етиштириш билан банд бўлади.
Жамшид Хўжаев, Ўзбекистон қишлоқ хўжалиги вазири
Изоҳ (0)