Индира Ганди номидаги Деҳли халқаро аэропортида 12 та тирик тўтиқушни ноқонуний равишда Тошкентга олиб келишга уринган 24 ёшли Ўзбекистон фуқароси Анваржон Раҳматжонов қўлга олинди. Бу ҳақда The Indian Express хабар берди.
Маълум қилинишича, аэропорт божхона ходимлари йўловчининг сумкасини сканердан ўтказаётганда, унинг ичидаги оёқ кийим қутисига солинган 12 тўтиқушнинг тасвирини кўрган. Ўзбекистон фуқароси тўтиқушларнинг юмшоқ ўйинчоқ эканлигини айтгач, божхона ходимлари уларни текшириб кўрган ва ҳушсиз ҳолдаги тўтиқушлар эканлигини аниқлаган.
Анваржон Раҳматжонов қушларни ноқонуний равишда олиб чиқиб кетишда гумонланиб, божхона идорасига олиб борилган.
Расмийларнинг маълум қилишича, Ўзбекистон фуқароси божхона қонунчилиги ва ёввойи табиатни муҳофаза қилиш бўйича ҳужжатларни бузгани учун қўлга олинган ва 18 октябрь, жума куни суд олдида жавоб беради.
Божхона ходимларининг қайд этишича, Ўзбекистон фуқароси Uzbekistan Airways рейсида Тошкентга учишни режалаштирган эди.
Сўров давомида маълум бўлишича, Раҳматжонов тўтиқушларнинг Тошкентда талаб юқори бўлган турига киришини айтган. У қушларни Ўзбекистонга олиб келиб сотмоқчи бўлган ва уларни ҳушсиз қилиш учун нимадир едирган. Унинг қайд этишича, бу Индира Ганди халқаро аэропортида қайд этилган қушларни олиб чиқиб кетишга уриниш билан боғлиқ биринчи ҳолат бўлган.
Изоҳ (0)