«А» гуруҳи
Гуруҳ фаворитларидан бири Сурия ўтган икки турда ҳам ғалабага эришди, дастлаб Мальдивни қийинчилик билан таслим этган сурияликлар 4-турда Гуамга жавобсиз тўртта гол урди. Бу икки ўйинда жамоа етакчиси Умар ас-Сома бешта гол уришга эришди. Яна бир етакчи Хитой эса дастлаб Гуамни 7:0 ҳисобида доғда қолдирди, бироқ кейинги баҳсда Филиппин майдонида нурсиз дуранг қайд этди. Гуруҳда йўқотишсиз кетаётган Сурия пешқадам бўлиб олди, Чин юрти вакиллари эса 7 очко билан иккинчи ўриндан жой олган.
«B» гуруҳи
Австралия ишончли ҳаракат қилишда давом этмоқда, ўтган ўйинларда «яшил қитъа» вакиллари йирик ғалабаларни қайд этди. Австралия Непалга бешта тўп киритилган бўлса, Хитой Тайпеи дарвозаси етти бор ишғол этилди. Иордания эса Кувайт билан бўлган ўйинда «қоқилди». Бу ерда ҳам жамоалар жойлашуви «А» гуруҳидаги каби бўлиб турибди. Австралия (9) ҳамда Иордания (7) жамоалари мос равишда биринчи ва иккинчи ўринни эгаллаб турибди.
«C» гуруҳи
Бу гуруҳ ўйин ва натижалари эса ўзига хослиги билан ажралиб турибди. Фаворит Эрон термаси 3-турда ўз майдонида Камбожага жавобсиз 14 та гол урди. Кейинги турда эса Баҳрайн майдонида ютқазиб қўйди. Шу тариқа форсларнинг ЖЧ саралашларидаги кетма-кет 23 ўйинлик мағлубиятсиз сериясига нуқта қўйилди. Сўнгги бор 2012 йилда Ўзбекистон терма жамоаси Эронни таслим этишга муваффақ бўлганди.
Ироқ термаси эса икки ғалаба қайд этган ҳолда гуруҳ биринчи поғонога кўтарилиб олди. 4-турдан кейин Ироқ ва Баҳрайн 7 очкодан тўплаган ҳолда пешқадамлик қилмоқда, Эрон эса икки ғалаба билан учинчи ўринни банд этган.
«D» гуруҳи
Октябрь ойидаги баҳслар Ўзбекистон терма жамоа жамоаси учун муваффақиятли якунланди. Дастлаб Тошкентда Яманни 5:0 ҳисобида мағлуб этган Вадим Абрамов шогирдлари беш кун ўтиб сафарда Сингапур устидан қийин ғалабани (3:1) қўлга киритди. Асосий рақиб Саудия Арабистони ўзида Сингапурни енгди (3:0), бироқ Фаластин сафаридан бир очко билан қайтишга мажбур бўлди.
Ушбу гуруҳда қизғин курашга бой ўтаётгани билан ажралиб турибди. Мазкур баҳслар бошланмасидан аввал сўнгги ўринда юрган Ўзбекистон терма жамоаси кетма-кет икки ғалабадан кейин биринчи ўринга кўтарилиб олди. 5 очко жамғарган Саудия эса иккинчи бўлиб турибди. Фаластин ва Сингапур термалари эса (4 очко) учинчи ўринни бўлишиб турибди. Яман икки очко билан сўнгги ўринни банд этган.
«E» гуруҳи
Гуруҳда биринчи рақамда сараланган Қатар термаси бошқа етакчилардан фарқли равишда ҳозиргача тўртта ўйинда иштирок этди. Мундиал мезбонлари кейинги йили Копа Америкада иштирок этиши инобатга олинган ҳолда тақвимга ўзгартириш киритилган. Қатарликлар ортда қолган икки турда осон бўлмаган ғалабаларни қўлга киритди. Амалдаги Осиё чемпиони дастлаб сафарда Бангладешни енган бўлса (2:0), 4-турда Уммон қаршилигини синдира олди (2:1). Уммонликлар учинчи турда Афғонистон устидан йирик ғалабани қайд этган ҳолда, олти очко билан иккинчи ўринда бормоқда. Қатар 10 очко билан етакчиликни ўз қўлига олган. Сўнгги Осиё чемпионатида ўзини яхши томонлама кўрсатган ва аввалроқ Қатар билан дуранг ўйнаган Ҳиндистонга омад етишмаяпти, ҳиндлар бу сафар ўз қўшнилари Бангладеш тўсиғидан ўта олмади (1:1).
«F» гуруҳи
Бу гуруҳда барчаси олдиндан тахмин қилинганидек кетмоқда. Япония бу сафар ҳам ўз рақибларини аяб ўтирмади. Аввалига Мўғулистонга олтита тўп киритган «кўк самурайлар» Душанбеда Тожикистонга жавобсиз учта тўп йўллади. Ортда қолган турларда Қирғизистон терма жамоаси ҳам муваффақиятли иштирок этди. Қирғизлар ўзида Мьянмага еттита гол урган бўлса, Мўғулистон майдонидан ҳам зафар билан қайтди.
Шу тариқа Япония юз фоизлик натижа билан пешқадамликни сақлаб турибди. Унинг ортидан Қирғизистон ва Тожикистон олти очко билан бормоқда.
«G» гуруҳи
Мазкур гуруҳда ҳам чигал вазият юзага келди. Бирлашган Араб Амирликлари 3-турда Индонезияни йирик ҳисобда мағлуб этди (5:0), бироқ кейинги ўйинда Таиландга имкониятни бой бериб қўйди. Вьетнам эса икки турда ҳам ғалабага эришган ҳолда 7 очко билан гуруҳ пешқадамлигини таиландликлар билан бўлишиб турибди. БАА улардан бир очко кам жамғарган ҳолда кучли учликни якунлаб берган.
«H» гуруҳи
Бу гуруҳда икки корейс жамоалари етакчилик қилмоқда. Жанубий Корея 3-турда Шри-Ланкани ўзида қабул қилиб, жавобсиз саккизта гол урди. Кейинги турда «Осиё йўлбарслари» Пҳенянга сафар қилди, бўм-бўш стадионда ўтган корейс дербисида нурсиз дуранг қайд этилди. Шунингдек, Ливан ҳам икки турда ғалабага эришган ҳолда гуруҳдаги вазиятини ўнглаб олди.
Қўшимча маълумотлар
Иккинчи саралаш босқичининг 3-турида 16 ўйиннинг 14 тасида майдон эгалари ғалабага эришди ва уларнинг ўнтасида йирик ҳисоб қайсд этилди. Бунга ОФК тақвимининг бир хиллиги сабаб бўлди. Ўша куни биринчи саватчада сараланганлар бешинчи саватча вакиллари билан тўқнаш келди, иккинчи саватча иштирокчилар эса гуруҳдаги тўртинчи жамоага қарши майдонга тушди. Бунинг устига фаворитлар ўз майдонида ҳаракат қилди.Кейинги турлар 14 ва 19 ноябрь кунлари бўлиб ўтади.
Нодирхон Ҳамидхонов тайёрлади
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)