Хоразм вилоятининг Хонқа туманидаги серқатнов йўлларда шоли қуритилмоқда, деб маълум қилди «Xabar.uz».
Хабарда айтилишича, хонқаликлар шолини эрта экиб, эрта йиғади. Кузги буғдой экиш мақсадида барвақт комбайнда ўрилган шолининг намлик даражаси юқори бўлгани учун, бундай ғаллани омборда сақлашнинг иложи йўқ. Шу сабабли шоликорлар уларни хирмонларда ёйиб, қуритиб олади.
«Хоразм вилоятининг барча туманларида шоли етиштирилади, фақат Хонқада эмас, — деган ҳайдовчи П.Қадамбоев. — Лекин хонқаликлар серқатнов йўллардан хирмон сифатида фойдаланишади. Баъзан машинани қаердан ҳайдашни билолмасдан гаранг бўласан киши».
Қайд этилишича, бундай ҳолат июнь ойида — буғдой ўрими мавсумида ҳам кўзга ташланади. Намлиги юқори ҳолда ўрилган ғалла йўлларга ёйилиб, қуритилиб, сўнг омборга қўйилади.
Хонқа туманининг 34-сув иншоотига элтувчи йўл «Ал-Хоразмий» қишлоғидан ўтади. Ушбу йўл аслида унчалик кенг эмас. Автомобильлар ҳаракати учун торроқ бўлган мазкур йўлда тез-тез йўл ҳаракати ҳодисаси юз бериб туради. Яқинда бу йўлда Ҳазорасп тумани Бўстон қишлоғидаги Аминовлар оиласидан икки нафар шахс: ота-бола аварияга учраб вафот этган.
Олажа, Томадурвадик, Ғалаба каби қишлоқларнинг туман марказига олиб борувчи серқатнов йўлларида ҳам айнан шундай ҳолатни кузатиш мумкин.
«Арзимас қоидабузарликни деб йўл ҳаракати хавфсизлиги хизмати ходимлари мияни роса ачитишади. Салбий ҳолатларнинг олдини олиш мақсадида ўзбошимча шоликорларга эса ғинг дейишмайди. Ахир бу ҳолат ҳам йўл қоидаларини бузиш саналади-ку!» — деган ҳайдовчи Ғ.Аҳмедов.
Изоҳ (0)