Xorazm viloyatining Xonqa tumanidagi serqatnov yo‘llarda sholi quritilmoqda, deb ma’lum qildi “Xabar.uz”.
Xabarda aytilishicha, xonqaliklar sholini erta ekib, erta yig‘adi. Kuzgi bug‘doy ekish maqsadida barvaqt kombaynda o‘rilgan sholining namlik darajasi yuqori bo‘lgani uchun, bunday g‘allani omborda saqlashning iloji yo‘q. Shu sababli sholikorlar ularni xirmonlarda yoyib, quritib oladi.
“Xorazm viloyatining barcha tumanlarida sholi yetishtiriladi, faqat Xonqada emas, — degan haydovchi P.Qadamboyev. — Lekin xonqaliklar serqatnov yo‘llardan xirmon sifatida foydalanishadi. Ba’zan mashinani qayerdan haydashni bilolmasdan garang bo‘lasan kishi”.
Qayd etilishicha, bunday holat iyun oyida — bug‘doy o‘rimi mavsumida ham ko‘zga tashlanadi. Namligi yuqori holda o‘rilgan g‘alla yo‘llarga yoyilib, quritilib, so‘ng omborga qo‘yiladi.
Xonqa tumanining 34-suv inshootiga eltuvchi yo‘l “Al-Xorazmiy” qishlog‘idan o‘tadi. Ushbu yo‘l aslida unchalik keng emas. Avtomobillar harakati uchun torroq bo‘lgan mazkur yo‘lda tez-tez yo‘l harakati hodisasi yuz berib turadi. Yaqinda bu yo‘lda Hazorasp tumani Bo‘ston qishlog‘idagi Aminovlar oilasidan ikki nafar shaxs: ota-bola avariyaga uchrab vafot etgan.
Olaja, Tomadurvadik, G‘alaba kabi qishloqlarning tuman markaziga olib boruvchi serqatnov yo‘llarida ham aynan shunday holatni kuzatish mumkin.
“Arzimas qoidabuzarlikni deb yo‘l harakati xavfsizligi xizmati xodimlari miyani rosa achitishadi. Salbiy holatlarning oldini olish maqsadida o‘zboshimcha sholikorlarga esa g‘ing deyishmaydi. Axir bu holat ham yo‘l qoidalarini buzish sanaladi-ku!” — degan haydovchi G‘.Ahmedov.
Izoh (0)