Андижон вилоятининг Булоқбоши тумани миришкорлари давлатга пахта сотиш шартномавий режасини 100,92 фоизга бажарди, деб хабар бермоқда Андижон вилояти ҳокимлиги матбуот хизмати.
Шу муносабат билан туман болалар ва ўсмирлар спорт мактаби ўйингоҳида туман ҳокими Ўткирбек Маъмуров бошчилигида тўпланган 3 мингдан зиёд булоқбошиликлар иштирокида фермер хўжаликлари раҳбарларини тақдирлаш маросими ўтказилган.
Вилоят ҳокими Шуҳратбек Абдураҳмонов «Сарвинисо Маликаси» фермер хўжалиги теримчиси Майрамхон Пирматовани Spark, «Абдуҳошим Нурматов» фермер хўжалиги раҳбари Абдуҳошим Нурматов ва «Абдуманноб Исматов» фермер хўжалиги раҳбари Исматулла Исматовни Gentra, туман ҳокимининг қишлоқ хўжалиги масалалари бўйича ўринбосари Баҳодир Ғофуровни Cobalt автомашинаси билан тақдирлаган.
Шунингдек, чигит экишдан бошлаб ҳозирги кунгача қишлоқ хўжалиги соҳасига узоқ йилик тажрибаларидан келиб чиқиб, ўз маслаҳатлари билан ёрдам бериб келаётган 15 нафар оқсоқол костюм-шим, 37 нафар илғор теримчи аёл кир ювиш машиналари билан тақдирланган.
Бундан аввал Қорақалпоғистонда энг кўп пахта терган оилаларга Spark, Амударё туманида пахта теримида илғорлик кўрсатган фермер хўжалиги раисига Cobalt, Андижон вилояти ҳокимлиги бир кунда ярим тонна пахта терган аёлга Spark, тўрт кунда 2,5 тонна пахта терган оилага Nexia совға қилган эди.
Изоҳ (0)