Ички ишлар вазирлигининг матбуот хизматидан олинган маълумотларга кўра, 2016 йил декабрь ойидан буён Ўзбекистонда яшаётган фуқароларнинг 8 348 нафари Ўзбекистон фуқароси бўлди.
Бунда 1992 йили қабул қилинган «Ўзбекистон Республикасининг фуқаролиги тўғрисида«ги қонун ва Ўзбекистон Конституциясининг 93-моддасидаги 22-банд асос бўлиб хизмат қилмоқда.
Мазкур ҳужжатлар асосида Ўзбекистон фуқаролигига қабул қилиш борасида қабул қилинаётган Президент фармонлари сони йилдан йилга ошиб бормоқда. Хусусан, 2016 йилда бошланган ушбу хайрли тадбир учун битта Президент фармони қабул қилинган бўлса, 2017 йилда 10, 2018 йилда 15, жорий йилнинг ўтган даврида эса 21 та фармон ижроси таъминланди. Айни вақтда уларнинг ҳаммаси фуқаролик паспортига эга.
«Паспорт инсоннинг юраги экан. Яратганга шукр, бугун фуқаролик паспортини қўлимга олдим. Сайловлар яқин. Мен ҳам энди сайлаш, сайланиш ҳуқуқига эгаман. Юртимизда амалга оширилаётган ислоҳотларда фаол иштирок этиб, мамлакатимиз тараққиётига хизмат қиламан», — дейди 1994 йилда Қирғизистондан келган ва Ўзбекистон фуқаролигини олган Иқболиддин Абдуллаев.
Изоҳ (0)