Ikrom Muslimov Oliy sud raisi o‘rinbosari etib tayinlandi. Avvalgi o‘rinbosar besh yilga qamalgan edi
O‘zbekiston Senatining 23-yalpi majlisida Oliy sud tarkibiga o‘zgartirish kiritish to‘g‘risida qaror qabul qilindi, xususan, Oliy sud raisining yangi o‘rinbosari tasdiqlandi.
“Daryo” muxbirining xabar berishicha, Ikrom Muslimov Oliy sud raisi Kozimjon Komilovning yangi o‘rinbosari — Ma’muriy ishlar bo‘yicha sudlov hay’ati raisi etib tayinlangan.
Ikrom Muslimov 1972-yilda Toshkent viloyatida tug‘ilgan. Millati — o‘zbek. Ma‘lumoti — oliy. Mutaxassisligi — huquqshunos. 1996-yilda Toshkent davlat yuridik institutini tamomlagan.
Mehnat faoliyati davomida adliya va sud idoralarida turli lavozimlarda ishlagan. 1998—2001-yillarda Toshkent viloyati Bo‘stonliq tumani sudyasi, 2001—2005-yillarda jinoyat ishlari bo‘yicha Toshkent viloyati sudi sudyasi, 2005—2013-yillarda Oliy sud sudyasi, 2013—2018-yillarda jinoyat ishlari bo‘yicha Buxoro viloyati sudi raisi bo‘lib ishlagan.
Ikrom Muslimov 2018-yil 14-dekabrdan hozirga qadar Oliy sud sudyasi va Jinoiy ishlar bo‘yicha sudlov hay’ati o‘rinbosari lavozimida ishlab kelayotgan edi.
Eslatib o‘tamiz, Oliy sud raisining sobiq o‘rinbosari — Ma’muriy ishlar bo‘yicha sudlov hay’atining sobiq raisi Bahodir Dehqonov 2019-yil fevralida xizmat xonasida hibsga olingan, sentabrda esa DXX sobiq raisi Ixtiyor Abdullaye ishi doirasida 5 yilga ozodlikdan mahrum etilgan edi.
