Туркманистонда 2019 йилнинг сентябрь—октябрь ойларида энг оммавий VPN-иловаларининг бир нечтаси блоклаб қўйилган. Аҳоли вакилларига давлатдаги интернет цензурасини айланиб ўтиши имкониятини берувчи дастурлар аввал ҳам Туркманистонда тез-тез блоклаб турилган.
Аммо VPN илованинг оммавийлашиши ва аҳоли орасида кенг тарқалганидан сўнг уни блоклаш кўп вақтни оларди.
«Энди VPN’ларни блоклаш яна ҳам тезлашди. Бунда нафақат AppStore ёки PlayMarket’даги бепул иловалар балки маҳаллий дастурчилар ишлаб чиққан ҳудудга мослашган дастурлар ҳам тез блоклаб қўйилмоқда», — дейди VPN’дан кўп фойдаланувчи журналистлардан бири.
VPN иловаларини телефон усталари ва смартфон сотувчилар ўрнатиб беради ва бу хизмат пулли. Шунингдек, иловани ишга туширгандан кейин ойига 50—60 манат тўлов талаб қиладиган обунани ҳам фаоллаштириш зарур.
Журналистнинг сўзларига кўра ушбу хизматдан фойдаланаётганларнинг аксарияти дастур бир неча кун ишлаб кейин блоклаб қўйилаётганидан шикоят қилмоқда. Сотувчилар эса иловани ўрнатгани учун олган пулларни қайтариб бермаяпти.
Туркманистонда Россиядаги «Роскомнадзор»га ўхшаш интернетдаги цензура масалалари билан шуғулланувчи давлат ташкилоти ёки идора йўқ. Сайтлар, сервислар ва иловалар изоҳсиз, огоҳлантириш, сабабини тушунтириш ёки суд қарори асосида тақиққа учрамайди.
Туркманистонда бир ой аввал Киберхавфсизлик хизмати ташкил қилинган. Шундан буён аҳолида VPN-иловаларини ишлатишда муаммолар кузатилмоқда.
Изоҳ (0)