Афғонистон разведкаси Осиёдаги «Ал-Қоида» террорчилик гуруҳи етакчисининг ўлдирилганини хабар қилди

Афғонистон разведкаси «Ал-Қоида» террорчилик ташкилотининг Жанубий Осиёдаги гуруҳи етакчиси, покистонлик Асим Омарнинг ўлдирилгани ҳақида хабар берди, деб ёзмоқда Ariananews.

Миллий хавфсизлик директоратининг (National Directorate of Security, NDS) маълумотига кўра, Покистон фуқароси Омар АҚШ ҳамда Афғонистон ҳарбийлари бирга Гилменд вилоятидаги Муса-Кала қишлоғида 23 сентябрда ўтказган ҳарбий ҳаракат вақтида отиб ўлдирилган.

«NDS ‘Ал-Қоида’нинг Ҳиндистон минтақасидаги етакчиси Асим Омарнинг ўлимини тасдиқлайди», — дейилган NDS’нинг Twitter’даги расмий саҳифасида. «Толибон» ҳаракатига қарши ўтказилган рейд вақтида Омар ҳамда яна Покистон фуқароси бўлган яна олти нафар жангари отиб ташланган.

Ҳалок бўлганлар орасида Омарнинг Усaма бен Ладен ҳамда Анвар ал-Авлоқий вафотидан кейин ташкилот раҳбари ва дунёнинг «биринчи рақамли террорчиси» бўлган Амана аз-Завахарий билан алоқа қилишига ёрдам берган Уммон агенти Райҳон ҳам бор.

Халқаро инқироз гуруҳи раҳбари ва АҚШнинг Афғонистондаги махсус элчиси Лорел Миллер TOLOnew’га берган интервьюсида, АҚШ билан тинчлик келишуви музокаралари вақтида «Толибонлар» ҳаракатига қўшилган бошқа жангариларнинг ҳам хориждаги шериклари билан алоқа қилишига тўсқинлик қилиш лозимлигини билдирди.

АҚШ ҳамда «Толибон» ҳаракати ўртасида тузилиши кутилган ва амалга ошиши кечиктирилган битимда ҳужум қилишни тўхтатиш, «Ал-Қоида» ва ИШИД террорчилик гуруҳлари билан алоқани узиш, улар билан АҚШ ҳамкорларига қарши ҳарбий ҳаракатларда иттифоқдош бўлмаслик кўзда тутилганди.

Деярли бир йил давом этган АҚШ ва «Толибон» ҳаракати ўртасидаги музокаралар томонлар келишув имзолашга яқин келган вақтда тўхтаб қолган. АҚШ президенти Дональд Трамп «Толибон» ҳаракатининг сентябрда Кобулдаги портлаш учун масъулиятни ўз зиммасига олганидан сўнг музокараларнинг сўнгги раундида иштирок этмаслигини маълум қилган.