Тошкент шаҳар ИИББ матбуот хизмати тармоқларда замонавий автомобиллар йўл-транспорт ҳодисалари оқибатида пачоқланиб кетаётгани тўғрисида тарқалаётган хабарларга муносабат билдирди.
«Ҳурматли ҳайдовчилар! Билингки, ҳатто ‘КамАЗ’лар ҳам ғижимланиб кетади. Қоғоз каби ғижимланиб, йиртилади. Тезликни оширганда қайсидир автомобилда хавфсизликда бўламан деб ўйламанг. Айнан тезликни ошириш ва бошқа шу каби хатолар йўлларда оғир оқибатларга сабаб бўлади, бунда автомобиль эмас, уни бошқарган одам айбдор.
Йўл-транспорт ҳодисалари рўй берганда кузовнинг йўғонлигининг хавфсизликка даҳли борми? Йўқ, кўплаб автоҳаваскорларнинг бу борадаги янглишмовчиликларига қарамасдан, бунинг аҳамияти йўқ. Бугунги кунда кузов панеллари енгилроқ, аммо юқори мустаҳкамликка эга бўлган материалларда тайёрланади. Аммо хавфсизлик борасида биринчи ўринда бугунги кунда юқори мустаҳкамликка эга бўлган пўлат қўлланилган тарзда ишлаб чиқариладиган кузовнинг куч тузилмаси аҳамиятлидир. Натижада автомобиль оғирлиги пасаяди, кузовнинг қаттиқлиги эса ошади. Ҳайдовчини ҳимоя қилиб, ўзига асосий зарбани қабул қилувчи қисм ҳам айнан кузовдир.
Автомобильларнинг ‘краш-тест’лари кўпинча 50 дан (максимум) 80 км/соатгача бўлган тезликда ўтказилади. Сабаби, турли давлатларда рухсат берилган тезлик кўрсаткичи шулар орасидадир. Аммо реал ҳаётда эса йўллардаги ЙТҲлар тезлик сезиларли даражада оширилганда содир бўлади», — дейилади хабарда.
ИИББ мисол тариқасида интернет тармоқларида тарқалган «танкларнинг» – хорижда ишлаб чиқарилган автомобилларнинг ЙТҲга учраганларидан кейинги ҳолатлари акс этган суратларни топиб, ҳавола этди.
Изоҳ (0)