Наманган давлат университети талабаси, фарғоналик Мирзоозод Мирзанеъматов оилавий шароити туфайли ўқишни давом эттиролмаслигини билдириб, ректор номига ариза ёзганди. Бу ҳақда «Дарё» мухбири Азизбек Абдувалиев хабар бермоқда.
Мирзоозоднинг айтишича, бундан олдин онаси талаба ўғлига таълим кредити олиш учун бир неча банкка борган, бироқ иши битмаган. Турли важ-корсонлар билан кредит ажратиш масаласи кейинга сурилган.
У мазкур ҳолат ҳақида 2 октябрь куни Facebook ижтимоий тармоғида пост қолдиради.
«Ҳар нарсадан бир ҳикмат излашга етган ақлим, 6 йиллаб ўқишга киролмаганимда, балки ҳеч қачон ўқимаслик пешонамга ёзилгандир, дейишга етмагандир балки. Майли, бундаям бир ҳикмат бордир. Мирзоозод қаттиқ ҳаракат қилди, аммо енгилди. Бошқа нарса деёлмайман, чунки томоғимга шундоғам бир нималар тиқилиб турибди. Устозларим ва Наманган халқига айтадиган охирги гапим — берган сабоғингиз ва нон-тузингизга рози бўлинг», — дейилади унда.
Ушбу пост эълон қилингач 200 га яқин изоҳ қолдирилади ва уларнинг аксариятида моддий кўмак таклиф этилади. Шунингдек, Мирзоозодга университет ректори, Ёшлар Иттифоқи вилоят кенгаши раиси қўнғироқ қилиб, ўқишни албатта давом эттириши зарурлигини таъкидлайди. Ёшлар Иттифоқи ҳарбий имтиёзга эга талаба контрактининг 35 фоизини тўлаб беришга тайёр эканлиги ҳам билдирилади.
—Бу постни Наманган вилояти ҳокими Хайрулло Бозоров ҳам ўқиган экан. Мени чақиртириб, таҳсилни ташлаш ҳақида асло ўйламаслигим, аксинча, ўқишни янада кучайтиришим кераклигини айтиб, танбеҳ берди. 7 октябрь куни 10 миллион 792 минг сўм бўлган шартнома пули у киши томонидан 11 миллион сўм қилиб тўлаб берилди. Ёшлар Иттифоқининг кўмаги эса келгуси йилга асқотадиган бўлди, — дейди талаба.
Қизиқ томони, контракт пули тўлаб берилган кун Мирзоозоднинг таваллуд санаси бўлган. Ўзининг айтишича, туғилган кунига бундан ортиқ совғани тасаввур этиш ҳам мушкул эди.
—Вилоят ҳокими бу холис яхшилик эканлиги, овоза қилиш керакмаслиги тайинлаганди, аммо бу гал у кишининг айтганини қилолмадим. Устига-устак, тўловчи сифатида ҳам менинг номим қайд этилган. Балки бу кўмак кимларгадир ўрнак бўлар? — дейди Мирзоозод.
Маълумот учун, Мирзаозод Мирзанеъматов 1994 йилда Фарғона вилоятининг Риштон туманида туғилган. НамДУ педагогика факультети иккинчи босқич талабаси. Ўзининг айтишича, «бир неча китобга етгулик» юзлаб шеърлар муаллифи.
Изоҳ (0)