Тошкент шаҳрининг Мирзо Улуғбек туманида 5 октябрдан 6 октябрга ўтар кечаси газ қувури шикастланишига олиб келган ЙТҲ содир бўлди, деб хабар бермоқда ИИББ матбуот хизмати.
Туманнинг Қорасув даҳасида ВАЗ-2106 машинасини бошқараётган 25 ёшли Ҳусниддин Х. тунги соат 1:41 атрофида Чахбуд кўчасидаги газ қувурини ушлаб турган устунга бориб урилган. ЙТҲ сабабли газ қувурининг бутунлигига зиён етиб, газ-ҳаво аралашмаси ўт олиб, ёнғин содир бўлган.
Ҳодиса ҳақида Давлат ёнғин хавфсизлиги бошқармасига соат 1:41 да маълум қилинган. Ўт ўчирувчилар воқеа жойига 8 дақиқадан кейин етиб келиб, ёнғин соат 2:30 да тўлиқ бартараф этилган.
Воқеа оқибатида жабр кўрганлар ва қурбонлар йўқ. Фалокатга автомобиль тормоз тизими носозлиги сабаб бўлган деб тахмин қилинмоқда.
Ҳайдовчига нисбатан Маъмурий жавобгарлик тўғрисидаги кодекснинг 134-моддаси (Ҳайдовчиларнинг йўл ҳаракати қоидаларини бузиши транспорт воситаларининг ёки бошқа мол-мулкнинг шикастланишига олиб келиши) бўйича маъмурий қоидабузарлик ҳақидаги баённома расмийлаштирилган.
Изоҳ (0)