Халқ депутатлари Андижон шаҳар Кенгашининг навбатдан ташқари сессияси бўлиб ўтди. Бу ҳақда «Дарё» мухбири Умиджон Мамарасулов хабар бермоқда.
Сессиясида шу кунга қадар шаҳар ҳокими вазифасини вақтинча бажариб келган Баҳромжон Ҳайдаров лавозимига расман тасдиқланди.
Баҳромжон Ҳайдаров жорий йил 26 август куни Дилмурод Раҳматуллаев ўрнига шаҳар ҳокими вазифасини вақтинча бажарувчи этиб тайинланганди.
Дилмурод Раҳматуллаев ижтимоий тармоқларда беҳаё суратлар тарқалганидан сўнг ишдан кетганди. У 2016 йилдан буён Андижон шаҳрига ҳокимлик қилиб келган.
Андижон вилояти ҳокими Шуҳратбек Абдураҳмонов собиқ ҳоким Дилмурод Раҳматуллаев ишига салбий баҳо бериб, уни кўп маротаба огоҳлантирганини алоҳида таъкидлаган. Кейинчалик у 30 га яқин ҳолатда қонун талабларига зид ҳужжатларни имзолагани аниқланган.
Баҳромжон Ҳайдаров 1972 йилда туғилган, маълумоти бўйича мутахассислиги иқтисодчи, молиячи. 1995 йилда Андижон иқтисодиёт ва бошқарув институти ҳамда 1998 йилда Банк-молия академиясини тамомлаган. Ҳоким этиб тайинланишидан аввал вилоят молия бош бошқармаси бошлиғи вазифасида фаолият кўрсатган. Оилали, уч фарзанднинг отаси.
Изоҳ (0)