Жиззах вилояти ҳудудидан ўтувчи М-39 автомагистрал йўлида туризм соҳасини ривожлантириш чоралари кўрилмоқда. Бу ҳақда вилоят ҳокимлиги хабар берди.
Жиззах вилояти географик жиҳатдан Ўзбекистоннинг марказий қисмида жойлашган бўлиб, вилоят ҳудудидан ўтувчи М-39 автомагистрал йўлидан кунига 25 мингдан ортиқ автомобиль ўтади. Шунингдек, вилоятнинг Дўстлик, Пахтакор, Шароф Рашидов ва Ғаллаорол туманларидаги миллий услубдаги умумий овқатланиш шохобчалари маҳаллий ва хорижий сайёҳларга хизмат кўрсатиб келмоқда, дейилади вилоят ҳокимлиги хабарида.
Ўзбекистон Президентининг 2019 йил 13 августдаги «Ўзбекистон Республикасида туризм соҳасини янада ривожлантириш чора-тадбирлари тўғрисида»ги фармонига асосан йўл бўйи инфратузилмасини ривожлантириш ва автомагистрал йўллари бўйлаб туризм хизматларини ташкил этишни назарда тутувчи чора-тадбирлар белгиланган. Унга кўра, Андижон вилоятининг Хонобод шаҳридан Сурхондарё вилоятининг Термиз шаҳрига боғланган ҳолда Қорақалпоғистон Республикасининг Мўйноқ шаҳригача «Ўзбекистон туризм магистрали» туризм транспорт коридорини ташкил этиш режалаштирилмоқда.
Ушбу фармон ижросини таъминлаш мақсадида Туризмни ривожлантириш давлат қўмитаси Бошқарма бошлиғи ўринбосари Икром Мамажонов бошчилигида Жиззах вилоят туризмни ривожлантириш ҳудудий бошқармаси ҳамда туман ҳокимликлари томонидан «Туризм магистрали» туризм транспорт коридорини ташкил этиш бўйича ҳудудларда ўрганиш олиб борилди.
Ўрганишлар натижаларига кўра, М-39 автомагистрал йўли ёқасидан 2020—2021 йилларда ташкил этиладиган 4 та йирик туристик мажмуага керакли тавсиялар ва тушунтириш ишлари олиб борилди.
Қайд этилишича, автомагистрал йўлларда туризм коридорини яратишдан асосий мақсад вилоятда туристларнинг бўлиш вақтини узайтириш ва уларга юқори сифатли қулайликлар яратиш ҳисобланади.
Изоҳ (0)