Шавкат Мирзиёев ҳузурида 16 сентябрда ўтказилган йиғилишда халқ таълими тизимини ислоҳ қилиш бўйича қатор вазифалар белгилаб берилди, деб хабар бермоқда Халқ таълими вазирлиги матбуот хизмати. Жумладан, таълим сифати бўйича Сирдарё вилоятини намунали ҳудудга айлантириш ташаббуси илгари сурилди.
Ушбу вазифанинг ижросини таъминлаш мақсадида 2 октябрь куни Сирдарё вилоят ҳокимлигида Бош вазир ўринбосари Азиз Абдухакимов раислигида Халқ таълими вазири Шерзод Шерматов, Таълим сифатини назорат қилиш давлат инспекцияси раҳбари Улуғбек Ташкенбаев, Давлат тест маркази директори Мажид Каримов, Гулистон давлат университети ректори Муҳсин Ҳожиевлардан иборат Республика ишчи гуруҳининг ташкилий йиғилиши ўтказилди.
Йиғилишда биринчи навбатда вилоятда мавжуд 309 та мактабларни хатловдан ўтказиш, уларнинг моддий-техника базаси аҳволини ўрганиш, мактаб директорларининг менежерлик қобилиятлари ва билимлари, 13 минг нафардан ортиқ фан методистлари ва ўқитувчилар ҳамда 9 минг нафарга яқин ўқувчиларнинг билим даражаларини аниқланган ҳолда вилоят халқ таълими тизимининг бугунги кундаги реал ҳолатини баҳолаш вазифаси муҳокама қилинди.
Шу мақсадда Давлат тест маркази томонидан вилоятдаги халқ таълими бошқаруви органлари ходимлари ва мактаб директорларининг раҳбарлик қобилияти, методист ва ўқитувчиларнинг тегишли фан бўйича билимларини тест синовидан ўтказиш ҳамда Таълим сифатини назорат қилиш давлат инспекцияси томонидан мактаб ўқувчиларининг билим даражасини ёзма ишлар орқали ўрганиш белгиланди.
«Ўрганиш натижалари ҳар томонлама таҳлил қилиниб, улар асосида ҳар бир мактаб, туман (шаҳар) кесимида ҳамда вилоят ва Республика даражасида Сирдарё вилоятида таълим сифатини ошириш юзасидан ‘йўл хариталари’ ишлаб чиқилади», — дейилади хабарда.
Изоҳ (0)