Жанубий Кореянинг Samsung Electronics технологик корпорацияси Хитойда ўз смартфонларини ишлаб чиқаришни тўхтатишга қарор қилди, деб хабар беради «Reuters».
Мазкур қарор маҳаллий смартфон ишлаб чиқарувчилар билан кучли рақобат, Хитой иқтисодиётнинг секинлашуви, шунингдек, Хитой ва АҚШ ўртасида давом этаётган савдо уруши фонида қабул қилинган.
Samsung Гуандун провинциясининг Хойчжоу шаҳрида жойлашган сўнгги заводида ишлаб чиқаришни тўхтатади. Ўтган йили Хитойдаги бошқа заводлари фаолиятини тўхтатган корпорация ёз ойида Хойчжоудаги заводида ишлаб чиқариш ва ходимларни қисқартиришини маълум қилганди.
Counterpoint компаниясининг маълумотларига кўра, Samsung’нинг Хитой смартфонлар бозоридаги улуши биринчи чоракда 1 фоизга қадар тушиб кетган (2013 йилда ушбу кўрсаткич 15 фоизни ташкил этган). «Хитойда одамлар маҳаллий бренддаги ҳамёнбоп смартфонларни ҳамда Apple ёки Huawei’ни харид қилмоқда. Samsung’да ушбу мамлакатдаги ўз улушини қайта тиклаб олиш имконияти жуда паст», — дейди Cape Investment & Securities компанияси таҳлилчиси Пак Сон Сун.
Изоҳ (0)