Facebook асосчиси Марк Цукерберг ўз компанияси ходимларига оммабоп TikTok дастурини унга ўхшаш дастур ёрдамида ортда қолдиришни режалаштираётгани ҳақида айтиб берди. Бу ҳақда The Verge’га таяниб, «Kod.ru» хабар берди.
The Verge жорий йилнинг июль ойида Цукербергнинг Facebook ходимлари билан бўлиб ўтган ички йиғилишининг аудиоёзувини қўлга киритган. Мазкур аудиоёзувдан маълум бўлишича, Цукерберг ходимларидан бирининг оммабоп TikTok хизмати билан қандай курашишни режалаштираётгани ҳақидаги саволга жавоб бера туриб, компания қисқа видеороликлар хизмати билан худди шундай вазифага эга бўлган Lasso мобил дастури ёрдамида рақобат қилади.
Facebook асосчисининг сўзларига кўра, TikTok кенг тарқалган мамлакатларда у билан рақобатга киришишдан олдин, Lasso TikTok ҳали кенг тарқалмаган мамлакатларда ишлай олиши ёки йўқлиги кўриб чиқилади. Унинг фикрича, вазиятни ўрганиш ва TikTok’дан ўзиб кетиш учун вақт бор.
Lasso 2018 йилда тақдим этилган. Цукербергнинг сўзларига кўра, дастур TikTok ҳали мустаҳкам ўрнашмаган мамлакатларда ишга туширилади, масалан, Мексикада.
Цукерберг TikTok’нинг ёшлар орасида, хусусан, АҚШ ва Ҳиндистонда янада оммалашаётганини тан олган.
ТикТок қисқа мусиқий видео яратишга, жонли эфирларни амалга оширишга ва хабар алмашишга имкон берувчи ижтимоий тармоқ ҳисобланади. 2016 йилнинг сентябрь ойида ишга туширилган дастур Хитойда қисқа видеолар бўйича етакчи ижтимоий тармоқ ҳисобланади. Дастур дунёнинг бошқа мамлакатларида ҳам оммалашиб, энг кўп юкланадиган дастурлардан бирига айланмоқда. Айни пайтда дастурдан 150 та мамлакатда 500 миллиондан ортиқ киши фойдаланади. Дастур фойдаланувчилари асосан ўсмирлар ҳисобланади. Дастур Хитойнинг ByteDance компанияси томонидан 2016 йилнинг сентябрь ойида ички бозор учун Douyin номи остида ишга туширилган. Кейинчалик дастурнинг нусхаси TikTok номи остида халқаро бозор учун ишга туширилган. Бу компанияга ўз мамлакати қонунларини бузмаган ҳолда халқаро миқёсда ривожланишга имкон берди.
Изоҳ (0)