«Дарё» таҳририятига мурожаат қилган Қарши давлат университети табиий фанлар факультетининг биринчи босқичини якунлаган Шаҳноза Маликова университет раҳбариятини адолатсизликда айбламоқда. Унинг айтишича, университетнинг табиий фанлар факультетида ўқитувчилар баҳо учун талабалардан яхшигина ҳақ олади.
Курсдан курсга қолдирилган собиқ талаба Шаҳноза Маликованинг айбловлари қай даражада асосли эканлигини ўрганиш мақсадида «Дарё» мухбири Отабек Қўлдошев Қарши давлат университетида бўлди.
Университетнинг табиий фанлар факультети декани Бобур Бойсуновнинг маълумот беришича, ректорнинг 2019 йил 10 сентябрдаги буйруғига кўра, талаба Шаҳноза Маликова ҳақиқатан ҳам курсдан қолдирилган.
— Шаҳноза Маликованинг ёзги семестрда 6 та фандан академик қарздорлиги мавжудлиги боис курсдан курсга қолдирилди, — дейди факультет декани Бобур Бойсунов. — Бироқ бу талаба буткул ўқишдан четлатилди дегани эмас. Талаба биринчи курсни муваффақиятли якунлолмагани боис курсни яна қайта ўқийди дегани.
Факультет деканига кўра, Шаҳноза Маликованинг курсдан курсга қолдирилиши талаба ўқишини давом эттириш учун белгиланган шартнома пулининг 50 фоизини қайта тўлашини англатади. Ва талаба биринчи босқичда қайта таҳсил олади.
Университет масъулларининг маълумот беришича, Шаҳноза Маликова ёзги семестр давомида 6 та фандан баҳо ололмаган. Шу боисдан ҳам Маликовада 6 фандан академик қарздорлик юзага келган. Ва курсдан курсга қолдирилган.
— Ҳатто исм-фамилиясини тўғри ёзолмайдиган ва дарсга ҳам деярли қатнашмаган курсдошларим баҳо олиб, ўқишини давом эттираяпти-ку, — дейди Шаҳноза Маликова. — Шуми адолат?
Шаҳноза Маликова ўзи таҳсил олган олийгоҳда таниш-билишчилик ва ўқитувчилар орасида коррупция авжига чиққанлигини, баҳо олиш учун ўзи ҳам ўқитувчиларга пул берганини тан олмоқда.
— Курсдошим Даврон, ҳатто дарсга ҳам қатнашмайди, аммо бинойидек баҳо оляпти, — дейди Шаҳноза Маликова. — Яна бир курсдошим Шоди эса олий математика фанидан якуний назоратда ўрнига ирригацияда таҳсил олувчи танишини киритганини декан Бобур Бойсуновнинг ўзи фош қилганди. Аммо имтиҳонга ҳам кирмаган курсдошим олий математикадан баҳо олишга муваффақ бўлди. Бу нимадан дарак беради?
Аниқланишича, Шаҳноза Маликова тилга олган талабалар табиий фанлар факультетида таҳсил олувчи Шаҳноза Маликованинг курсдошлари Даврон Эштемиров ҳамда Шодиқул Худойназаровлар бўлиб чиқди. Факультет декани Бобур Бойсунов Шодиқул Худойназаровнинг олий математика фанидан якуний назоратга ҳақиқатан ҳам танишини киритганини, ҳолатни шахсан ўзи аниқлаб сохта талабани якуний назоратдан четлаштирганини тасдиқлади. Декан, шунингдек, Шодиқул Худойназаров якуний назоратни қайта топшириб баҳо олганини айтди.
Факультет деканининг маълум қилишича, ўша якуний назорат ишлари Самарқанд вилоятида текширилган.
Мурожаатчи талабанинг «Дарё» мухбирига билдиришича, у жорий йилнинг август ойида 6 та фандан имтиҳонларни қайта топшириш учун университетга келган. Аммо ўқитувчилар қайта топшириш сентябрь ойида бўлишини билдирган.
— Сентябрда ўқишга келсам, курсдан қолдирилганимни биляпман, — дейди собиқ талаба.
Табиий фанлар факультети декани Бобур Бойсуновнинг тушунтиришича, Олий ва ўрта махсус таълим вазирининг 2018 йил 9 августдаги буйруғига илова қилинган Низом талабларига кўра, фанлардан академик қарздорлиги 4 та ва ундан кўп бўлса, қайта топширишга рухсат берилмайди. Улар олий таълим муассасаси ректори буйруғига биноан курсдан қолдирилади.
Қарши давлат университети ректори Баҳодир Шоимқуловнинг 2019 йил 10 сентябрдаги буйруғига мувофиқ Шаҳноза Маликовадан ташқари табиий фанлар факультети «Кимё» йўналишида таҳсил олувчи яна 3 нафар талаба курсдан курсга қолдирилган. Бобур Бойсуновнинг айтишича, жорий ўқув йили бошида факультетда таҳсил олувчи 7 нафар талаба курсдан қолдирилган.
Шаҳноза Маликованинг маълумот беришича, у билан биргаликда курсдан қолдирилган 3 нафар курсдоши ўқишини ташлаб, хорижга ишлашга кетяпти.
Талаба Маликованинг иқрорича, факультетда адолатсизлик кўп. Ўқитувчилар оралиқ ва якуний назоратлар учун талабалардан 15—20 минг сўмдан пул олади. Фан ўқитувчисига баҳо учун бериладиган маблағ гуруҳ сардори томонидан йиғилади. Қолаверса, имтиҳон саволлари доимий равишда сотилади. Гуруҳ сардори Элёр Кенжаев ҳар сафар имтиҳон саволларини олиб келиб, курсдошларига сотиб олганини, пул йиғишлари лозимлигини айтган.
Мазкур айбловларни рад этган факультет декани Бобур Бойсунов оралиқ ва якуний назорат саволлари ўқув йили бошидан барчага эълон қилинишини билдирмоқда.
— Август ойида қайта топширишга имкон берилмади дейишмоқда, — дейди Шаҳноза Маликова. — Аммо энг қизиғи августда мен билан бирга имтиҳонларни топширолмай юрган Шаҳзод, Даврон исмли курсдошларим ҳам ўқишини давом эттирмоқда. Факультетдагиларнинг айтишича, улар қайта имтиҳон топширган.
Бобур Бойсуновнинг айтишича, фанлардан 3 тагача академик қарздорлиги бўлган талабаларга қайта топшириш учун имконият берилган. Ва Шаҳноза Маликова тилга олган талабалар ўша 3 тагача қарздорлиги мавжуд бўлган талабалар ҳисобланади.
Шаҳноза Маликова ўқиши давомида ҳаётида шахсий муаммолари кўпайиб, турмуши нотинч бўлиб қолганини ва бу ҳақда университет раҳбариятини ҳам огоҳлантириб тегишли ҳужжатлар тақдим қилганини айтяпти. Унга кўра, олийгоҳ раҳбарияти бунга эътибор ҳам бермаган.
— Шаҳноза Маликова қишки семестрда ҳам кўплаб фанлардан баҳо ололмай қийналганди, аммо биз оилавий аҳволини инобатга олиб талабамизга ёрдам бердик, — дейди факультет декани. — Ўша пайтда талабамизни оилавий муаммолари қийнаб қўйганини тўғри тушунгандик.
Курсдан қолдирилган талаба ва у айтаётган иддаоларга жавоб берган факультет раҳбарияти ўртасидаги можарога хулоса бериш фикридан йироқмиз. Ҳар доимгидек сўнгги сўзни масъуллардан, бу сафар эса Олий таълим вазирлигидан эшитамиз.
Изоҳ (0)