Давлат божхона қўмитаси ижтимоий тармоқларда Қозоғистоннинг «Тажен» чегара божхона постидан Қорақалпоғистон Республикаси «Довуд ота» чегара божхона постига киришда 40 та «фура» тирбандлик сабабли навбатда турганлиги тўғрисида тарқалган хабарларга муносабат билдирди.
Қорақалпоғистон Республикаси божхона бошқармаси «Довуд ота» чегара божхона пости томонидан тирбандликларни олдини олиш мақсадида, сентябрь ойининг сўнгги кунларида республикага кириш йўналишида ҳаракатланувчи юк автотранспорт воситаларини божхона назорати ва расмийлаштируви барча куч ва воситалар сафарбар қилинган ҳолда амалга оширилмоқда.
Божхона чегараси орқали ҳаракатланган автотранспорт воситалари сони таҳлил қилинганда, сентябрь ойи якуни бўйича уларнинг ҳаракати ўтган даврга нисбатан кескин ошганлиги кузатилган.
Бугунги кунда республиканинг чегара божхона постлари орқали кунига ўртача 130 минг фуқаро, 6 000 тага яқин автотранспорт воситалари ҳаракатланаётган бўлиб, шундан 2 300 таси юк автотранспорт воситалари, 3 700 таси эса енгил автотранспорт ва автобусларни ташкил этади.
«Биргина, «Довуд ота» чегара божхона пости орқали сентябрь ойи бошида ҳар куни ўрта ҳисобда 150 та юк автотранспорт воситалари божхона расмийлаштирувидан ўтказилган бўлса, 26—30 сентябрь кунлари давомида ҳар куни ўрта ҳисобда 230 та юк автотранспорт воситалари божхона расмийлаштирувидан ўтказилган.
Божхона пости орқали ўтиш учун келган автотранспорт воситалари замонавий назорат-техник воситалардан самарали фойдаланган ҳолда тезкорлик билан, ҳеч бир монеликсиз ва сунъий тўсиқларсиз божхона назоратидан ўтказилмоқда. Чегара божхона постларида автотранспорт воситлари тирбандлиги ҳолатларини олдини олиш мақсадида божхона органлари томонидан барча зарур чоралар кўрилмоқда. Бу масалада қўшни давлатлар божхона хизматлари билан ҳам ҳамкорликда ишлар ташкиллаштирилган», — дейилади хабарда.
Сутка давомида ҳаракатланган автотранспорт воситалари бўйича маълумотлар интернет тармоғидаги Давлат божхона қўмитасининг «bojxona.uz» расмий сайтига реал вақт режимида жойлаштириб борилади.
Изоҳ (0)