Саудия Арабистони қироли Салмон бин Абдулазиз ас-Сауднинг тансоқчиси Абдулазиз бин Беддаҳ ал-Фағим 28 сентябрь, шанба куни дўсти Мемдуҳ ал-Али томонидан отиб ўлдирилган. Бу ҳақда Al-Arabiya телеканали Макка шаҳридаги полиция бошқармасига асосланиб хабар берди.
Маълум бўлишича, Абдулазиз бин Беддаҳ ал-Фағим ўз дўсти Турки ас-Себтининг Жидда шаҳридаги уйига келган ва у ерда яна бир дўсти Мемдуҳ ал-Али билан жанжаллашиб кетган. Шундан сўнг, Мамдуҳ уйдан чиқиб, у ерга қурол билан қайтиб кириб, уйдаги барчани бетартиб ўққа тутган. Отишма оқибатида уч киши жароҳатланган. Улар орасида қиролнинг тансоқчиси Абдулазиз ҳам бўлган. У оғир яраланиб, шифохонада оламдан ўтган.
Воқеа жойига полиция етиб борган. Уларга таслим бўлишни истамаган жиноятчи ва полициячилар ўртасида отишма юз берган. Отишмада 5 нафар полициячи ҳам яраланган. Жиноятчи отиб ўлдирилган.
Изоҳ (0)