Қозоғистонда эркак 17 ёшли қизни 2 яшар жияни гувоҳлигида зўрлади. Жиноятчи собиқ ҳуқуқ-тартибот ходими деб тахмин қилинмоқда

Қозоғистоннинг Жезқазған шаҳрида 17 ёшли қиз ўғирлаб кетилди. Tengrinews’нинг ёзишича, қизнинг ёнида 2 ёшли жияни ҳам бўлган.

Содир бўлган ҳодиса ҳақида жамоат арбоби Абильда Абдикаримов Facebook’даги саҳифасида маълум қилган. Унинг айтишича, воқеа 10 июнь куни юз берган. Қиз боғчадан 2 ёшли жиянини олиб кетаётганида жиноятчи уларнинг икковини ушлаб, машинасига куч ишлатиб ўтқазиб, квартирасига олиб келган.

Бу ерда қизнинг бошига уриб, овозини ўчирган ва уни зўрлаган. Қизнинг жияни бу пайтда уларнинг олдида бўлган. Эркак унинг юзини кўрпа билан ёпиб қўйган.

«Эртаси куни жиноятчи болани боғча олдида қолдирган ва ўлдириш билан таҳдид қилиб, қизни Олмаота вилоятидаги Теректи қишлоғига кечаси тунаш учун олиб кетган. Эртасига эса Жезди қишлоғига олиб кетган», — деб ёзмоқда Абильда Абдикаримов. Унинг айтишича, тахмин қилинаётган жиноятчи собиқ ҳуқуқ-тартибот ходими бўлиши мумкин.

Қизнинг ота-онаси Сатпаев ва Жезқазған шаҳарлари прокуратурасига мурожаат қилган, аммо ҳеч қандай натижа чиқмаган. 26 сентябрь куни эса вилоят прокурорининг шахсан қабулида бўлган.

Қарағанда вилояти полиция бошқармаси матбуот хизмати ушбу факт бўйича Жиноят кодексининг 120-моддаси (Зўрлаш) бўйича судгача тергов ҳаракатлари олиб борилаётганини билдирган ва тегишли экспертиза тайинланган.