O‘zbekistonda foyda solig‘i stavkasi 12 foizdan 15 foizga oshirilishi biznes yashirin holatda ishlashga o‘tishiga olib kelmasligi kutilmoqda. Bu haqda Moliya vazirining o‘rinbosari Dilshod Sultonov ma’lum qildi, deya xabar beradi “Gazeta.uz”.
Prezident farmoniga ko‘ra, joriy yil 1-oktabrdan qo‘shimcha qiymat solig‘i 20 foizdan 15 foizga tushiriladi. Shu bilan birga, 2020-yilda yuridik shaxslarning foyda solig‘i bazaviy stavkasini 15 foiz miqdorida belgilash rejalashtirilmoqda. Ayni vaqtda dividendlar tariqasida to‘lanadigan daromadlar solig‘i stavkasi 5 foiz darajasida saqlab qolinadi.
Moliya vaziri o‘rinbosarining ta’kidlashicha, yil boshidan foyda solig‘i va yagona ijtimoiy to‘lovning pasaytirilishi biznes legallashuviga turtki berdi.
“Biznes legallashib, oldin konvertda to‘langan ish haqini ko‘rsatishni boshladi. 2 million so‘mdan oshiq maosh oladiganlar soni keskin ko‘paydi. Agar oldinlari ishlovchilarning 18 foizi 2 million so‘mdan ortiq maosh olgan bo‘lsa, hozirda bu ko‘rsatkich 25 foizga yetdi”, — dedi Sultonov.
Moliya vaziri o‘rinbosarining qayd etishicha, O‘zbekistonda foyda solig‘i stavkasi 35, 24, 15, 5 va 14 foizni tashkil etgan. Hozirgi 12 foizli stavka esa sobiq Ittifoq hududida eng pastlardan biri hisoblanadi. Jumladan, Qirg‘izistonda ushbu stavka 10 foiz bo‘lsa, qolgan barcha davlatlarda 15—20 foiz atrofida.
“Dividendlardan olinadigan soliq 5 foiz miqdorida qolmoqda va u sobiq Ittifoq hududidagi past ko‘rsatkichlardan biri hisoblanadi. Jami foyda solig‘i stavkasi esa 19,3 foiz atrofida bo‘ladi. Armaniston va Qozog‘istonda bu raqam 24, Ozarbayjonda 28, Rossiyada 30,4 foizga teng”, — ta’kidladi Dilshod Sultonov.
Izoh (0)