“Daryo” tahririyatiga Samarqand shahrida yashovchi Fadiya G‘afurova murojaat qilib, hozirda Jizzax viloyati, Sharof Rashidov tumani hokimi, Samarqand viloyatining sobiq hokimi Zoir Mirzayev shahardagi U.Jo‘raqulov ko‘chasida joylashgan avtoshohbekatidagi savdo do‘konini noqonuniy tarzada buzib tashlaganini bayon qilgan.
— Bu yer tashlandiq joy edi. Shu yerda joylashgan korxona ishchilari uyini suv bosgan. Shu sababli hokimlik kimki o‘z mablag‘i hisobidan fuqarolarga joy qilib bersa yer berishini ma’lum qilgandi, — deydi Fadiya G‘afurova. — Biz Anatoliy Lyubimovga O‘zbekiston ko‘chasi, 55-uydan uy olib berdik. Shundan so‘ng evaziga menga shu yerdan 54 kvadrat metr yer ajratib berdi. Bu yerdagi jarliklarni o‘zimizning hisobimizdan to‘ldirdik. Shag‘al sotib olib yerto‘lani ko‘tardik. Birinchi va ikkinchi qavatni quyma blok (shlakablok) bilan ko‘tarib chiqdik. Uchinchi qavatni quramiz deb turganimizda hudud UNESCO’ga tegishli ekanligini, UNESCO prokuraturaga berganligini aytib qolishdi. Bu yerda qurilish bo‘lmaydi deyishdi. Shu bilan ancha yil qoldi.
Ma’lum bo‘lishicha, 2009-yilda Fadiya G‘afurovaga savdo do‘konini buzish bo‘yicha qog‘oz kelgan. Tadbirkor agar bino buziladigan bo‘lsa bunga qarshiligi yo‘qligini bildirgan. Qilingan xarajatlar uchun tovon puli berishlarini so‘ragan.
– Men davlatning yeriga da’vo qilmayman. Ammo bu savdo do‘konini qurishga mablag‘ sarflaganman. Biroq hokimlik vakillari hozir mablag‘ yo‘qligi, shu sababli pul to‘lolmasligini aytdi. Shundan so‘ng men “Pul to‘lanmasa do‘konim ham turaveradi” dedim. Shundan so‘ng meni o‘sha paytda Samarqand viloyat hokimi bo‘lgan Zoir Mirzayev hokimlikka chaqirdi. Keyin prokuraturadan odam qo‘shib yubordi. Ular menga bosim o‘tkazib, joyni bepul tashlab ketishimni istadi, — deydi Fadiya G‘afurova.
Fadiya G‘afurovaning qarshiligiga qaramasdan, tadbirkor ishtirokisiz va sud hukmisiz uning xususiy mulki buzib tashlangan.
— 2017-yilning 23-mart kuni ko‘chadan o‘tib ketayotganda qarasam menga tegishli bino yo‘q. Avtostansiya direktorining oldiga kelib “Do‘konimni kim buzdi?” deganimda Zoir Mirzayev buzganligini aytdi. “Buzilgan binoning qurilish materiallari qani?” deb so‘raganimda olib chiqib ketilganligi, qolganlari maydalab yerto‘laga joylashtirganligini aytdi, — deydi Fadiya G‘afurova.
Tadbirkor bir necha bor Prezident portaliga murojaat qilgan. Ammo ushbu murojaatlar ham oxirigacha o‘rganilmagan. Aniqrog‘i, portalga yozilgan murojaat prokuraturaga yuborilgan.
– Prokuratura murojaatimni yozib olib, 54 kvadrat metr maydonga ega bo‘lgan bino o‘rniga ikki baravar hisobida yer qilib berilishini aytdi. O‘sha vaqtda Samarqand viloyat prokuraturasining 7-bo‘lim boshlig‘i Feruz Alimov o‘n bor uyimga kelib, binoni qurib beramiz deb aytdi. Sababi binoni buzishda aynan o‘sha prokuror bo‘lgan. Biroq u ham aldab ketdi, — deydi tadbirkor. — O‘n marotaba hokimlikka ariza tashladim. 4-5 marotaba arxitekturaga bordim. Unisi bunisiga yuboradi, bunisi unisiga yuboradi. “Qarab turing, xat boradi” deydi. Uch yildan beri qarab turibman xat keladi deb.
Ma’lum bo‘lishicha, bino buzilishidan avval Samarqand viloyat hokimligidan Ulug‘bek (familiyasini eslolmadi) degan yigit Fadiya G‘afurovani o‘sha vaqtdagi viloyat hokimi Zoir Mirzayev chaqirayapti deb olib ketgan. Zoir Mirzayevning xonasida bino masalasi muhokama qilingan. Uzoq muhokamadan so‘ng tadbirkor ayol bino buzilishidan norozi ekanligini bildirib, chiqib ketgan.
Shundan so‘ng uni hech kim bezovta qilmagan. Tadbirkorning aytishicha, Zoir Mirzayevga bino buzilmasligini aytgani uchun o‘ch olish maqsadida garchi Toshkentga ketgan bo‘lsada uning savdo do‘konini buzdirib tashlagan.
Bugungi kunda buzilgan binosini qayta tiklash va o‘rniga zamonaviy usulda bino qurish maqsadida Fadiya G‘afurova ko‘plab mutasaddi tashkilotlarga murojaat qilgan. Biroq, negadir yuqori turuvchi tashkilotlar tadbirkor ayolga bino qurish uchun ruxsat bermayapti.
Samarqand shahar hokimining qurilish masalalari bo‘yicha o‘rinbosari Rustam Olimovning 2019-yil 3-aprelda yo‘llagan xatida “Shohi Zinda” ko‘chasida joylashgan maishiy xizmat ko‘rsatish do‘konini qayta qurishga ruxsat berish to‘g‘risida qilingan murojaat shahar arxitektura va qurilish bo‘limi tomonidan o‘rganib chiqilganligi bildirilgan. Xususan, mazkur hudud Samarqand shahar tarixiy yodgorliklarni saqlash va ulardan foydalanish Davlat nazorat inspeksiyasi tomonidan tarixiy yodgorliklarning qo‘riqxona kiritilganligi sababli Samarqand viloyati tarixiy yodgorliklarni saqlash va ulardan foydalanish Davlat nazorat inspeksiyasining texnik shartlari asosida, Samarqand viloyat qurilish bosh boshqarmasi qoshidagi shharsozlik kengashiga taqdim etilishi ma’lum qilingan.
— Men buzilgan binoni o‘zim zamonaviy qilib qurmoqchiman. Ammo menga hech kim ruxsat bermayapti. Hokimlik qilmaysan deydi. Viloyat bosh arxitektoriga murojaat qildim. Ammo birortasi javob bergani yo‘q, — deydi Fadiya G‘afurova.
Tadbirkor ayolning aytishicha, U.Jo‘raqulov ko‘chasida joylashgan avtoshohbekatdagi binoni buzilishi bo‘yicha viloyat hokimi Erkinjon Turdimovga murojaat qilmagan. Faqat Samarqand viloyat arxitektura boshqarmasiga murojaat qilgan.
— 2009-yilda hokimlik meni savdo do‘konim bilan bir qatorda bekatda baland qurilgan boshqa binolarni buzish bo‘yicha 3 kun muhlat bergandi. Ammo ular kecha-kunduz ishlab, binosini bitqazib oldi. Ularga hech kim indamadi. Xo‘sh, nega? Axir ikkala bino ham UNESCO hududda joylashgan-ku? Nima uchun ularning qurilishiga ruxsat boru, bizning qurilishga ruxsat yo‘q, — deydi tadbirkor. — Men bu savolni kerakli joyga bermoqchiman. Ammo meni kalta-kulta qilib yuboradi-da. Quloq ham solmaydi. Tirik ekanman, joyimni hech kimga bermayman, binoni qayta tiklayman.
Tadbirkor ayolning aytishicha, yangi bino qurish uchun Toshkentdan ruxsat berilgan. Ammo negadir Samarqandda qurilishga ruxsat berilmayapti. Shuningdek, Madaniy meros ob’ektlarini muhofaza qilish va ulardan foydalanish ilmiy-ishlab chiqarish bosh boshqarmasining Samarqand va Jizzax viloyatlari bo‘yicha davlat inspeksiyasi boshlig‘i Maysara Nabirayeva ham Fadiya G‘afurova bino qurishiga ruxsat bermayapti.
– Shu yil bahor oylarida Davlat inspeksiyasi boshlig‘i Maysara Nabirayevaning oldiga borib, o‘zi bilan uchrashgandim. Undan avval “snos” vaqtida bir necha bor borganman. Yaqin kunlarda ham bordim. U kishi yo‘q. Yo mehmon kutadi yoki kasal bo‘ladi. Shu sababli oldiga kira olmayman, — deydi Fadiya G‘ofurova.
“Daryo” tadbirkorning mazkur shikoyati yuzasidan mutasaddilardan javob kutadi.
Izoh (0)