Туркманистон жанубида аҳоли унга бир ой аввал навбатга ёзила бошлади

Туркманистоннинг Мари вилоятида аҳоли давлат дўконларидаги арзон унга кейинги ой учун навбатга ёзила бошлади, деб хабар беради Fergana News.

Мари туманидаги «Зарпчи» ва «Тазе Оба», Мургаб туманидаги «Қизил Байдак», «50 ийлик», Байрамалин туманидаги «Туркманистон» дон бирлашмаларида энг таранг вазият кузатилмоқда.

«Айрим ҳолларда ун савдога чиққач, одамлар унга талашиб, бир-бирини уриб кетади. Ун ҳаммага етмайди.

Дўконлар ишчилари харидорларга уларнинг исми рўйхатда бўлмаса, кейинги ой учун навбатга ёзилишини ҳамда ҳар куни хабар олишни айтади», — дейилади хабарда.

Одамлар ҳатто бир ойда бир марта оиланинг ҳар бир аъзоси учун берилиши керак бўлган маълум миқдордаги унни ҳам ололмайди», — дейди нашр манбаси.

Қайд этилишича, гап ун етишмаслиги ҳақида эмас, балки маҳаллий ишлаб чиқарувчилар томонидан тайёрланадиган арзон уннинг етишмаслиги ҳақида бормоқда. Хусусий дўконлар ва бозорда ун 5—6 баравар қиммат сотилади.