Калифорния штати Фримонт шаҳри полиция департаментидаги ягона Tesla Model S электромобилининг қуввати гумондор та’қиб қилинаётган вақтда тугаб қолди. Бу ҳақда Meduza хабар берди.
Ҳодиса 20 сентябрда кузатилган. Полициячи Жесси Хартман Сант-Клара шаҳридаги жиноятга алоқадорликда гумон қилинаётган шахс бошқараётган автомобилни та’қиб қилишни бошлади. Ҳайдовчи тўхташни истамаган, та’қибдаги машиналар тезлиги соатига 200 километргача етган.
Орадан маълум вақт ўтгач, Хартман диспетчер билан боғланган ва 10 километрга етадиган қувват қолгани сабаб та’қибни давом эттира олмаслигини маълум қилган.
Гумондорни Tesla ўрнида қолган бошқа одатий патрул машиналари қувлаган, Хартман эса электромобилни қувватлагичга қўйиш учун кетган.
Аммо орадан тахминан 8 дақиқа ўтгач қолган полициячилар ҳам гумондор автомобилни жуда хавфли бошқараётгани сабабли қувғинни тўхтатган. Кейинроқ ушбу шубҳали автомобиль ташландиқ ҳолатда Сан-Хоседан топилди. Ҳайдовчи яширинишга улгурган.
Фримонт полицияси электромобилнинг қуввати аввалги навбатчиликдагилар уни қувватлагичга қўймагани сабабли тугаб қолганини билдирган. Идорадагилар оддий автомобилда ҳам ноқулай вақтда бензин тугаб қолиши мумкинлигига урғу берди.
Фримонт полицияси Tesla Model S’ни 2018 йилда 61 минг АҚШ доллари эвазига харид қилганди. Tesla бир йил давомида полиция ишларига мослаштирилган ва 2019 йил март ойида синовдан ўтказилган. Tesla аввал ҳам камида битта гумондорни та’қиб қилиш амалиётида иштирок этган.
Изоҳ (0)