Квиннипэкс университети президент Дональд Трампга қарши импичмент эълон қилиниши юзасидан аҳоли вакиллари ўртасида сўров ўтказди, деб ёзади The Hill маълумотига таяниб «Коммерсантъ».
Фуқароларнинг кўпчилик қисми яъни 57 фоизи импичментга қарши, сўровда қатнашганларнинг 37 фоизи конгрессдагилар фикрига қўшилмоқда.
Сўров 19—23 сентябрь кунлари 1,4 минг америкаликлар ўртасида ўтказилган. Аввал шунга ўхшаш социологик тадқиқотни Монмут университети вакиллари ўтказганди. Ушбу изланишдан сўнг овоз берувчиларнинг 59 фоизи импичментни ёқламаган, 35 фоизи эса унга розилик берган.
Ушбу сўровларнинг иккиси ҳам Трампнинг Украина президенти Владимир Зеленский билан телефондаги сўзлашуви стенограммаси эълон қилингунига қадар ўтказилган. Суҳбат мазмунидан бохабар бўлгач демократлар импичмент бошлаш ташаббусини илгари сурганди. Телефондаги сўзашувда Дональд Трампнинг 2020 йилда бўлиб ўтадиган президентлик сайловларида асосий рақиби бўлиши кутилаётган Жо Байденнинг ўғли Хантер Байденга нисбатан ўтказилаётган тергов ишлари ҳақида гап борган.
Демократларнинг фикрича, АҚШ президенти Зеленскийга босим ўтказган. Сўзлашувлар мазмуни ошкор бўлгач АҚШ Конгрессининг вакиллари палатаси спикери Нэнси Пелоси импичмент жараёнини бошлаш зарурати пайдо бўлганлигини маълум қилди. Ўз навбатида АҚШ Адлия вазирлиги бунда амалдаги қонунчилик зид келувчи ҳолатлар кузатилмаганини қайд этган ва кейинги суриштирув ишларини тўхтатган. Владимир Зеленский ҳам АҚШ томонидан ўзига босим ўтказилган деб ҳисобламаяпти.
Изоҳ (0)