Қорақалпоғистоннинг Мўйноқ тумани «Қозоқдарё» овул фуқаролар йиғинида 23 сентябрь куни Ўзбекистон «Қизил китоб»ига киритилган 13 та жайронни отиб ўлдириб, олиб кетаётган фуқаролар ушлангани ҳақида хабар берилган эди.
Бош прокуратура матбуот хизматидан хабар беришларича, Тахтакўпир туманида яшовчи беш фуқаро қонун талабларининг қўпол равишда бузилиши ҳисобланган бу қилмиши билан ҳайвонот дунёсига 145 миллион сўм зарар етказган.
Қўшимча қилишларича, ҳолат юзасидан 24 сентябрь куни Орол табиатни муҳофаза қилиш прокуратураси томонидан Жиноят кодексининг 202-моддаси 3-қисми «ж» банди (Ўзбекистон «Қизил китоби»га киритилган ҳайвонот ёки ўсимлик дунёси турларини нобуд қилган ҳолда ҳайвонот дунёсидан фойдаланиш тартибини бузиш) билан жиноят иши қўзғатилган.
Ушбу модда бўйича айбдор деб топилган шахслар энг кам ойлик иш ҳақининг 400 баравари (89 200 000 сўм)дан 600 баравари (133 800 000 сўм)гача миқдорда жарима ёки уч йилдан беш йилгача озодликни чеклаш ёхуд уч йилдан беш йилгача озодликдан маҳрум қилиш билан жазоланади.
Қайд этиш жоиз, етказилган моддий зарарнинг ўрни уч карра миқдорда, Ўзбекистон «Қизил китоби»га киритилган камёб ва йўқолиб бораётган ҳайвонот ҳамда ўсимлик дунёси турларига нисбатан етказилган зарарнинг ўрни эса беш карра миқдорда қопланган тақдирда, озодликни чеклаш ва озодликдан маҳрум қилиш тариқасидаги жазо қўлланилмайди.
Бош прокуратурадан қўшимча қилишларича, ҳозирда дастлабки тергов ҳаракатлари олиб борилмоқда.
Эслатиб ўтамиз, сентябрь ойи бошида «Қозоқдарё» овул фуқаролар йиғинида жойлашган Акпеткей кўллар тизимида ўтказилган рейд вақтида браконьерлар экоинспекторлар машинасига ўқ узган эди. Кейинроқ ноқонуний ов билан шуғулланиб келган бу фуқароларнинг шахси аниқланиб, уларнинг бари ушланган эди.
Шунингдек, 3 августда Қорақалпоғистонинг Тахтакўпир туманида уч бош, 25 августга ўтар кечаси Бухоро вилоятининг Қоракўл туманидаги ихтисослаштирилган давлат ўрмон хўжалиги ҳудудида икки бош урғочи жайронни овлаган браконьерлар қўлга олинган.
Изоҳ (0)