Олмазор туман ҳокими ўринбосари Абдурасул Ваҳобов 14 август куни «Kun.uz» ходимларига таҳдид қилган эди. Орадан бир кун ўтиб Тошкент шаҳар ҳокимлиги матбуот хизмати томонидан Ваҳобовнинг видеоинтервьюси эълон қилинди ва унда ҳоким ўринбосари «Kun.uz» мухбири Раҳматилла Исроилов муқаддам ундан тамагирлик йўли билан ер талаб қилгани ва бунинг эвазига катта миқдорда пора таклиф этгани ҳақидаги даъвони илгари сурган эди.
Абдурасул Ваҳобовнинг мазкур даъвосидан сўнг «Kun.uz» зудлик билан ўз ички суриштирувини ўтказган, мухбир Раҳматилла Исроилов ўзига нисбатан ҳоким ўринбосари Ваҳобов илгари сураётган айбловларни рад этган эди. Шунингдек, Раҳматилла Исроилов ўзига нисбатан оғир жиноят содир этишда айблаб туҳмат қилгани учун Олмазор туман ҳокими ўринбосарига нисбатан қонуний чора кўришни сўраб, Президент виртуал қабулхонаси орқали Бош прокуратурага шикоят йўллаганди.
Кейинроқ мазкур ҳолат юзасидан Тошкент шаҳар прокуратураси томонидан терговга қадар текшириш ҳаракатлари олиб борилаётгани, ушбу текшириш жараёнлари эса Бош прокуратура томонидан назоратга олингани маълум қилинди. Маълум бўлишича, 11 сентябрь куни мазкур терговга қадар текшириш ҳаракатлари ниҳоясига етказилган ва Абдурасул Ваҳобовнинг ҳаракатларида жиноят аломатлари йўқлиги сабабли Жиноят-процессуал кодексининг 83-моддаси 2-бандига асосан жиноят иши қўзғатишни рад этиш тўғрисида қарор қабул қилинган.
Қарорда таъкидланишича, Олмазор туман ҳокимлиги томонидан ҳоким ўринбосари Абдурасул Ваҳобовнинг хатти-ҳаракатлари қонунийлиги юзасидан ўтказилган хизмат текшируви хулосасига кўра, у касб этикаси ва хизмат лавозими мажбуриятларига тўлиқ риоя қилган.
Ваҳоланки, Вазирлар Маҳкамасининг 2016 йил 2 мартдаги 62-сонли қарори билан тасдиқланган «Давлат бошқаруви органлари ва маҳаллий ижро этувчи ҳокимият органлари ходимларининг одоб-ахлоқ намунавий қоидалари»нинг 12-бандида давлат хизматчилари хушмуомала, илтифотли, одобли, эътиборли, фуқаролар ва ҳамкасблари билан муносабатда сабр-тоқатли бўлиши, уларни ҳурмат қилиши шартлиги, давлат хизматчилари ўзига бўйсунувчиларга ва фуқароларга нисбатан қўполлик қилмаслиги, одамларнинг шаъни ва қадр-қимматини камситмаслиги, уларга асоссиз психологик ва жисмоний таъсир кўрсатиш ҳолатларига йўл қўймаслиги лозимлиги белгилаб қўйилган.Вазирлар Маҳкамасининг юқорида айтилган қарорининг 4-бандида одоб-ахлоқ қоидалари нормаларининг бузилиши қонун ҳужжатларига мувофиқ интизомий ёки бошқача жавобгарликка тортиш учун асос бўлиб ҳисобланиши мумкин.
Бироқ «Kun.uz» мухбирларига нисбатан содир этилган ҳоким ўринбосари Абдурасул Ваҳобовнинг видеолавҳаларга муҳрланган хатти-ҳаракатлари касб этикаси ва хизмат лавозими мажбуриятларига тўлиқ риоя қилинган, дея топилгани бизни ҳайрон қолдирди.Аммо энг муҳими бу эмас. Гап шундаки, 11 сентябрь куни шаҳар прокурори ўринбосари А.Пўлатов тасдиқлаган жиноят иши қўзғатишни рад этиш тўғрисидаги қарорда Абдурасул Ваҳобовнинг фақат ҳокимият биносида «Kun.uz» мухбирларига тажовузи бўйича ҳуқуқий баҳо берилган ва ҳоким ўринбосарининг ушбу ҳаракатларида жиноят аломатлари йўқ, дея топилган.
Аммо Абдурасул Ваҳобовнинг видеомурожаатидаги мухбир Раҳматилла Исроилов муқаддам ундан тамагирлик йўли билан ер талаб қилгани ва бунинг эвазига катта миқдорда пора таклиф қилгани ҳақидаги масала ҳамда мухбир Раҳматилла Исроиловнинг ҳоким ўринбосари Абдурасул Ваҳобов унга туҳмат қилаётгани ҳақидаги Бош прокурор номига йўллаган мурожаати бўйича лом-мим дейилмаган. Ахир «Kun.uz» мухбири Раҳматилла Исроиловнинг Бош прокурорга йўллаган мурожаатининг асосий мазмуни айнан туман ҳокими ўринбосари унга оммавий ахборот воситалари орқали оғир жиноятни содир этишда туҳмат қилаётгани ҳақида эди-ку?
Масаланинг яна бир эътиборли жиҳати — Раҳматилла Исроиловнинг мурожаати Тошкент шаҳар прокуратураси томонидан ўрганилган бўлса-да, унинг натижалари ҳақидаги жавоб хати Олмазор туман прокуратураси томонидан берилган.
«Жисмоний ва юридик шахсларнинг мурожаатлари тўғрисида»ги қонуннинг 27-моддаси 5-қисмига кўра жавоблар мурожаатда кўрсатилган ҳар бир масала бўйича важларни инкор этувчи ёки тасдиқловчи аниқ асосларни (заруратга қараб қонун ҳужжатлари нормаларига ҳаволалар қилинган ҳолда) ўз ичига олган бўлиши керак.
Қабул қилинган қарор ва мухбир Раҳматилла Исроиловга берилган жавоб хатида номувофиқликлар мавжудлиги, мурожаатдаги важлар мазмунан кўриб чиқилмагани боис мазкур масала Бош прокуратура томонидан қайта кўриб чиқилса ва очиқ қолаётган қатор саволларга ойдинлик киритилса, мақсадга мувофиқ бўлар эди.
«Kun.uz»нинг баёнотидан
Изоҳ (0)