АҚШ давлат котиби Майк Помпео барча мамлакатларни Эронни Саудия Арабистони нефть конларига уюштирилган ҳужум сабаб жазолашга чақирди. Помпео Twitter’даги саҳифасида АҚШ номидан Буюк Британия, Германия ва Францияга «Эроннинг Саудия Арабистонига қилинган ҳужумда айбдорлиги ва бу уруш ҳудуд ҳамда бутун дунёга таъсир кўрсатганини» очиқ айтгани учун миннатдорчилик билдирди. Бу ҳақда «Коммерсантъ» хабар тарқатди.
«Бу дипломатияни мустаҳкамлайди ва дунё ишини фаоллаштиради. Биз барча мамлакатларни Эроннинг ҳаракатларини кескин қоралашга чорлаймиз»,— деб ёзган Помпео.
Аввал Буюк Британия, Германия ва Франция етакчилари Саудия нефть объектларига ҳужумлар учун айб Эрон зиммасида эканлигини билдирган. Мамлакатлар Теҳронни баҳсли низолар, ядро ва ракета дастурлари масалаларини ҳал этишга чақирган.
Эслатиб ўтамиз, 14 сентябрь куни дронлар Saudi Aramco нефтни қайта ишлаш заводига ҳужум уюштирган эди. Ҳужум бўйича масъулиятни яманлик исёнчи хусийлар ўз бўйнига олган бўлса-да, АҚШ содир бўлган воқеада Эронни айблаган эди. Саудия Арабистони мудофаа вазири дрон ва ракеталарнинг қолдиқларини кўрсатиб, ҳужумга Эроннинг алоқаси борлигини исботлаган эди.
АҚШ президенти Дональд Трамп 20 сентябрь куни Эронга нисбатан янги санкцияларни эълон қилиб, Яқин Шарққа қўшимча ҳарбийларни жўнатишни маъқуллади.
Изоҳ (0)