Саудия Арабистонидаги нефть объектларига уюштирилган ҳужум бўйича жавобгарлик Эрон зиммасига юкланди. Бу ҳақда Буюк Британия, Германия ва Франция ҳукуматларининг қўшма баёнотида маълум қилинди, деб хабар беради «Коммерсантъ».
Ушбу давлатлар Теҳронни ўзининг ядровий ва ракета дастурларига оид баҳсли масалаларини ҳал этиш мақсадида музокарага чақирмоқда.
«Ҳужум учун Теҳрон жавобгарлиги ойдек равшан. Бошқа изоҳ йўқ», — дейилади баёнотда. Буюк Британия бош вазири Борис Жонсон, Германия канцлери Ангела Меркель ҳамда Франция президенти Эммануэль Макрон БМТ Бош ассамблеяси доирасида музокара ўтказди. Улар, шунингдек, Эронни иғво уюштирмасликка чақирди.
Эслатиб ўтамиз, 14 сентябрь куни дронлар Saudi Aramco нефтни қайта ишлаш заводига ҳужум уюштирган эди. Ҳужум бўйича масъулиятни яманлик исёнчи хусийлар ўз бўйнига олган бўлса-да, АҚШ содир бўлган воқеада Эронни айблаган эди. Саудия Арабистони мудофаа вазири дрон ва ракеталарнинг қолдиқларини кўрсатиб, ҳужумга Эроннинг алоқаси борлигини исботлаган эди.
АҚШ президенти Дональд Трамп 20 сентябрь куни Эронга нисбатан янги санкцияларни эълон қилиб, Яқин Шарққа қўшимча ҳарбийларни жўнатишни маъқуллади.
Изоҳ (0)