АҚШ Нью-Йоркда ўтадиган БМТ Бош ассамблеясида Эрон президенти Ҳасан Руҳонийга ҳамроҳлик қилувчи делегация аъзоларига виза тақдим этмади. Бу ҳақда Эрон президенти администрацияси маълумотига таяниб «Kommersant.ru» хабар бермоқда.
«Президентга ҳамроҳлик қилувчи администрация ўринбосарлари ва пресс-пулга виза ажратилмаганлиги дипломатик мажбуриятларнинг бажарилмаганлигини англатади», — дейди президент администрацияси раҳбарининг ўринбосари Парвиз Исмоилий.
Унинг сўзларига кўра, Вашингтон бу йўл билан Эрон Ислом Республикасининг «овозини ўчириш»га уринмоқда.
Аввалроқ АҚШ Руҳоний ҳамда Давлат департаментини «БМТ делегатларига виза бериш бўйича мажбуриятларини бажармаганлик»да айблаган Эрон Ташқи ишлар вазири Жавод Зарифга визалар тақдим этган.
АҚШ вице-президенти Майк Пенс CNBC телеканалига берган интервьюсида Вашингтоннинг БМТ Бош ассамблеясида иштирок этувчи эронлик расмийлар учун визалар сони чекланишини маълум қилган, лекин айнан кимларга виза берилмаслигига аниқлик киритмаган.
Изоҳ (0)